Di acuerdo cu un publicacion di primicia di e portal “Noticia Cla” e siman aki, a informa cu Gobierno di Aruba a otorga tereno na e compania local Three Rivers Real Estate NV pa explota un tereno di 105.000 m2 cerca di Baby Beach pa desaroya un hotel di 900 camber (600 All Inclusive y 300 Transient) na Sero Colorado cu ta bin cu un inversion di mas cu 100 miyon florin. E hotel lo yama Baby Beach Resort y lo wordo opera dor di Apple Vacations.
Por lo menos un partido politico, esta UPP encabesa pa Candelario “Booshi” Werver a sali mesora awe critica henter e proyecto, argumentando cu Aruba a yega su limite di capacidad di carga y cu no tin espacio pa mas hotel, ni pariba di brug y ni pabou di brug. E ta corda tur hende cu e tipo di proyectonan asina ta causa cu mester importa mas trahado, como 4 trahado pa cada camber di hotel. Esey cu tur consecuencia pa AZV, pa SVb, pa nos sistema di enseñansa y asina por sigui menciona.
