Diamars a anuncia cu lo bay bin un otro hotel mas. Kico esaki ta nifica. Booshi Wever tin un bista completo riba e nificacion di e futuro hotel aki pa loke ta nos isla.
El a splica cu diamars el a keda asombra ora cu e ta mira riba Facebook e publicacion riba e firmamento di un MoU di e dos Odubernan, unda cu nan a keda hopi straña cu di un banda ta papia di proteha medio ambiente.
Tin un presidente di Parlamento cu ta na Bruselas awor aki pa papia riba Medio Ambiente y ta mira atrobe un joya di un beach, un di e tikinan cu a resta, cu ta bay wordo un biaha mas, entrega na inversionistanan stranhero, pa bin ocupa e parti aki.
Recientemente un proyecto cu a wordo gaba di dje di sr. Dangui Oduber, den futuro por bisa cu nos pueblo no lo por haci uzo di esaki mas.
Esaki ta lamentabel, segun Wever. Pasobra no solamente bo ta pone un hotel na unda cu e pueblo di Aruba no tin acceso directo mas pa e beach aki. Ora cu e hotel establece aki, cual ta uno di cinco streya, nan lo bay exigi pa nan bishitantenan, nan hendenan cu ta kedando cerca nan, nan huespednan, nan por tin acceso y nan so por haci uso di esaki. Wever ta haya esaki lamentabel. Ta un parti lamentabel di nos medio ambiente cu ta bay wordo perdi.
A caba di otorga mas di 500 tereno pa traha cas. Tur hende tin derecho di haya cas, pero un biaha mas, nos naturalesa lo bay sufri cu esaki y parce cu ningun hende ta worry cu e cosnan aki. Apart di esaki, e hotel lo bay tin necesidad di trahado. Nos tur sa caba cu na Aruba, ya caba nos no tin trahadonan pa traha den hotel. Atrobe nos tin cu bay importa trahado. Importacion di trahadonan aki ta importacion directo y problemanan social.
Pakico
E personanan aki, si mira y tende kico Glenbert Croes a priminti den campaña cu bin aki tin derecho di reunificacion familiar. No sa kico e kiermen pa nos pais, unda cu nos ta bay bira sobrepobla, unda cu nos no por carg’e unda cu tin cu mas scol, mas caminda, lo bay tin mas presion riba AZV. E uno solo proyecto aki cu UPP a bisa, no mas hotel pa Aruba, pasobra simplemente no ta necesario. Wever ta tende cu mester bin cu e hotel pa paga nos mega debe. E cos aki ta bay pone nos den mas debe atrobe. Ta importacion di problemanan social, unda cu no ta bay tin scol pa nos propio yiunan y kico ta bay para di e dropoutsnan. Dropouts ta bay bira pio y problemanan social lo keda crece. Ta cosnan cu tin cu para keto un rato. Ta spera cu e NGOnan riba medio ambiente lanta para pa esaki. Mescos cu a protesta riba esun di Isla di Oro, mester lanta contra esaki.
Ora cu tin cu tende atrobe cu ta tira culpa riba gobierno anterior cu nan a firma, aparentemente e tereno aki a wordo hasta hopi problema tambe. E ora Wever ta puntra su mes, dicon no ta reta e contractnan aki. E contractnan a wordo firma cu otro hende, a para nan. Para esaki tambe. Na Corsou tabata tin un caso cu a bende Cas di Corsou na Den Haag y Corsou a gana e caso. Na Aruba, nos bienestar general no ta wordo sirbi cu e hotel aki, segun Wever.
E ta kere cu tin espacio pa lanta un caso contra e contract aki. Si nan kier sigui cun’e, bay dilanti corte, laga corte wak si e ta respeta esaki. Tin espacio pa reta e decision aki y para e proyecto. E proyecto aki simplemente, manera cu Wever a bisa, no tin ningun balor agrega pa desaroyo di Aruba y loke ta bay pasa ta cu no lo bay tin luga mas pa nos Arubianonan, Wever a splica.
