Booshi Wever: Antes mi tabata sospecha, awo mi ta convenci cu tin corupcion!

For di dia cu e proceso a inicia pa compra di e incinerator chikito pa kima sludge, cadaver di animal y desperdicio medico, partido UPP a indica cu un biaha mas a scoge un procedura cu ta carga tur carasteristica di un “fix-bidding”! UPP ta hopi cla, nan focus ta completamente dirigi riba e forma di proceder di gobierno den e asunto aki, pasobra ora cu tin un destaho esey mester ta honesto, transparente y integro. Bou ningun circumstancia ta permiti pa privilegia un compania y/o persona. Pero den e caso aki e proyecto y su procedura hiba ta hole mas stinki cu e “sludge” cu nan kier bay kima.

Ex Minister Booshi Wever a mustra con kier a bulldoze e incinerator chikito aki, apesar cu casi tur compania invita pa e destaho bou man a manda un carta di protesta cu nan tur a haya mucho tiki tempo pa por bid drechi. Solamente un compania no a protesta y esaki ta nada mas ni nada menos e compania cu a privilegia. Te hasta DOW a bisa Minister Otmar Oduber cu e companianan de facto tin razon pa por lo menos duna mas tempo of para e “fix-bidding” aki, pero e Minister no tabata tin oido pa esaki.

Ora cu a habri tur e envelopnan, e resultado tabata cu en todo caso e compania cu e Minister kier a privilegia, mescos cu a sosode den varios otro “fix-bidding”, NO tabata esun mas barata. Esaki DOW a notifica Minister tambe den un conseho! Pero e Minister no a sigui e conseho aki y a duna DOW instruccion pa otorga e bid na e compania privilegia, usando pretextonan incorecto y no berdad. Pa acelera e proceso, mesora ta duna instruccion na DOW pa laga e “privilegiado” haci e ordo mesora! Ora tera a cuminsa bira cayente bou di su pianan a core firma un “Letter of Intent” cu Serlimar, asina e lider di UPP ta skirbi den su relato.

Serlimar na su turno tambe a cuminsa cu “bulldozing” di e trabounan. Un di e prome pasonan tabata desmantela e planta di Bouldin & Lawson. UPP a manda un carta pa FDA y Gobierno di Aruba y di Hulanda, alabes Parlamento di Aruba y 2de Kamer di Hulanda pa motibo cu aki ta trata di “kapitaalsvernietiging” y destruccion di un patrimonio di pueblo. Aki atrobe ni Minister Otmar Oduber ni Serlimar no a “give a damn” y e desmantelacion a cuminsa diamars 23 di april 2019. Pero diripente un dia despues, esta diaranson dia 24 di april a para tur trabou di desmantelacion. Dicon? Kico a induci pa para esaki? E por tabata e carta di UPP na e.o FDA of e articulo di UPP?

Nos a bin compronde sinembargo cu tin otro motibonan cu por cierto ta ilustra e tristo realidad con Serlimar ta wordo maneha, desde cu e Minister a tuma mando di e compania estatal aki. Tin indicacion cu e Director di Corsou cu no kier a keda atras cu e privilegiamento di amigonan, a firma 2 contract cu un compania Curasoleño pa 200 mil florin cada uno?

Y pa evita mucho pregunta a manda un so pa Raad van Toezicht pa aprobacion “achteraf”? Nos mester corda cu e Director por firma te 250 mil florin sin aprobacion “VOORAF” di e Raad van Toezicht. Dus e ta spierto. E sa cu e no por firma e contract pa 400 mil florin sin aprobacion “vooraf” di e Raad van Toezicht. Ta p’esey e ta “split” e contract den dos y firma dos contract di 200 mil florin cada uno. Y by the way ambos contractnan SIN ningun clase di destaho. Y pa colmo ta un di e contractnan firma SO e director a manda RvT. Y un “klokkenluider” lo a notifica e RvT  di e “foefje” aki di e Director. Ta p’esey Raad van Toezicht a para e trabounan di e.o. e desmantelacion?

Kico ta cay bou di CORUPCION: “corruptie is het politieke, sociale of economische verschijnsel waarbij iemand in een machtspositie deze misbruikt ten einde zichzelf of anderen gunsten te verlenen”! Despues cu mi a repasa e documentonan y alabes haya mas informacion, mi ta totalmente convenci cu Otmar Oduber y por lo menos e Director di Serlimar a haci nan mes culpabel na corupcion conforme e definicion ariba menciona. Ta p’esey nos ta exigi pa nos haya copia di e documentonan, cu mi por a repasa, pero tambe otro documentonan cu mi sa cu tin pero cu mi no a haya pa repasa. Apesar cu mi no a haya tur documento pa repasa, mi por bisa pues cu, si prome di a repasa e documentonan, mi tabata tin un sospecho, awor despues di a repasa e documentonan mi no tin ningun duda y ta CONVENCI cu Minister Otmar Oduber ta culpabel na actonan cu ta cay bou di e loke mi a pone ariba.

Mas cla mi no por ta. Ta di spera cu Otmar Oduber no “beat around the bush”. Si UPP su acusacion no tin base, anto of Otmar Oduber of e Director por acudi na Corte pa exigi rectificacion. Please no purba na desvia atencion y no chicken-out!!!