Minister di Labor y Asuntonan Social, Glenbert Croes tabata masha contento di por anuncia cu tur cobrado di “Bijstand” of tambe yama “Onderstand” a cobra dos biaha nan “salario” e luna aki di december. No ta algo nobo, sino ta for di hopi aña caba cu ta sostene famianan dobel pa e dianan aki di Pasco y Aña Nobo.
“Un noticia di speransa pa e famianan cu ta pasando den momentonan hopi dificil, tur hende cu ta riba bijstand ta cobra bonus di fin di aña”, asina e mandatario a anuncia den fin di siman. Diasabra ultimo a haci e pagonan corespondiente na cobradonan di bijstand di Departamento di Asuntonan Social.
E reforma di Gobierno ta pa mehora bida di nos conciudadanonan, un cambio husto cu lo percura pa tur hende sinti un alivio y mira un mehoransa den nan cartera ya cuminsando cu e bonus pa tur hende por tin un feliz celebracion di fin di aña, asina e comunicado di prensa di Ministerio di Asuntonan Social a duna di conoce.
