Abo tabata sa cu e fruta sorsaca tin hopi beneficio? Si, hopi di nos kisas ya no ta come mas pero e fruta di sorsaca cu hopi di nos generacionan anterior tabata come tin masha hopi beneficio pa nos curpa.
Laga nos analisa e mata y su fruta prome. Sorsaca su nomber original ta Annona muricata y e ta un mata cu ta origina for di e famia di mata Annonaceae. E ta un mata cu constantemente ta keda berde y e tin blachinan den un forma ovaal. Loke ta resalta hopi ta cu e blachinan ta di un color berde bastante briyante parti ariba di e blaachi pero parti abou di e blaachi ta un berde mas suave y dof.
Pa esnan cu no conoce e mata y mucho menos e fruta…Laga nos purba di splica con e ta. E sorsaca ta un fruta cu tin un forma manera un peer cu eigenlijk ta malforma. E por yega un tamaño di 20 pa 35 centimeter. Su peso por yega te cu maximo 6 kg. Su casca ta color berde scur y e tin manera sumpiñanan riba dje. Su fruta paden ta color blanco, suave, fibroso y cu un sabor combina di dushi y zuur. Mescos cu algun otro fruta, e sorsaca tambe ta cambia liher di color manera cu e bin den contacto cu aire, di blanco e ta bira bruin.
Sorsaca ta wordo usa hopi pa traha bebida cu ne. Su origen natural ta Caribe y America Central pero ta wak mas cultivonan rond di mundo (entre otro partinan di Africa y China) pa motibo di su beneficionan cu e tin pa e curpa humano. Algun ehempel: e ta efectivo contra parasitonan y bichi, ta baha presion di sanger, ta wordo recomenda ora bo ta sufri di depression of stress y tin efectonan hopi positivo pa baha e riesgo di cancer.
