Diaranzon a bin cu un grupo di invitado di Aruba hunto cu periodistanan. E vuelo a tuma mas of menos 28 minuut for di Aruba pa Boneiro, cual ta un record pa e CRJ, segun Frank Arends, kende ta gerente general di Aruba Airlines. Nan ta na Boneiro como invitadonan di e Departamento di Turismo. Nan ta hopi contento cu e pueblo di Boneiro a acepta pa bin y tambe pa subi e Airlift entre e isla Aruba-Boneiro y Boneiro Aruba, pa motibo cu ultimo temponan no tabata tin e conexion manera cu tabata desea. Locual cu tabata tene e Bonerianonan, hopi abao ta, cu e tarifa di e ticket cu tabata tin, tabata mata nan cu nan no por a sali for di Boneiro. Esey ta research cu a haci den pasado. A bisa cu mester bin y cu un tarifa hopi abao cu ta 315 florin pa ticket ida y vuelta. E ta inclui tambe e airporttax di Boneiro. Esun di Aruba si mester wordo paga pa e pasahero na Aruba. A habri e sistema di booking tres siman atras, cual ta bayendo hopi bon. Tin hopi interes. Gruponan a sali tanto di Aruba y tambe for di Boneiro pa fin di aña y carnaval. Ta premira un bon operacion entre e dos islanan aki.
Con a midi
Arends a splica cu a cuminsa cu 4 vuelo pa siman. A scoge riba un diamars, diahuebs, un diasabra y diadomingo, dunando asina espacio na un hende cu bin pa un siman of pa bin pa dos tres dia, e por scoge entre e dianan cu a pone. Tur e vuelonan ta pasa via Corsou. Solamente diadomingo tin un vuelo straight pa Boneiro. Pero no ta bisa cu e ta keda te aki, pasobra a cuminsa caba sinti e deseo pa vuelonan, maske ta un biaha pa siman Aruba-Boneiro Boneiro Aruba. Cu esey lo bay por ta den e itinerario nobo otro aña, por hinca esey aden tambe.
Conexion
E pasaheronan cu ta subi for di Aruba pa Boneiro, ta bay Corsou, eynan ta keda sinta 20 minuut den avion. Pasaheronan di Aruba Corsou ta baha y esun di Corsou-Boneiro ta subi abordo y e avion ta sigui den 30 minuut pa Boneiro. Vice versa, Boneiro-Aruba, ta bolbe bay bek via Corsou y ta mesun cos. Pasaheronan di Boneiro cu ta keda Corsou ta baha y esunnan pa Aruba ta keda den avion y despues di 20 pa 30 minuut total, e avion tin cu sali bek pa Aruba. Asina ta cu ningun pasahero di transito no ta baha.
