Tur cos ta mustra cu e homber Ulrich Heinrich Gravenhorst naci dia 10 januari 1977 na Boneiro lo celebra su hacimento di aña den cel na Warda di Polis. E ta tata di dos yiu muhe cu tabata riba e vuelo di KLM cune biniendo for di Amsterdam pasa via Aruba di transito pa Boneiro. Pero na dado momento, sinta den avion, el a grita cu e tin un bom cune y tambe un arma di candela. El a haci esaki pasobra e tabata pura pa bay y a sinti cu e proceso ta tarda. Su grito a paralisa henter e vuelo di KLM.
E mes a keda tera pero e yiunan si a sigui pa Boneiro. KLM no a sinti cu e yiunan ta un menasa mirando e comportacion y actuacion di nan tata. A avisa e famia na Boneiro di e caso y cu e muchanan ta yegando nan so.
E menasa di Ulrich Heinrich Gravenhorst a causa cu mester a hala e avion for di edificio di aeropuerto y hibe na un area aleha. Eynan a saca tur maleta y repasa tur cos pafo y paden di e avion prome cu a laga e avion liber pa sigui su vuelo. E biaha aki e costonan di e retraso lo ta menos cu esun di TUI biaha pasa.
E avion di TUI biaha pasa a keda tera e anochi y mester a acomoda tur hende den hotel y activa henter un operacion. Eynan tambe a detene e sospechoso Hulandes pero despues a lag’e liber.
Den caso di Ulrich Gravenhorst probablemente e chens tey cu e si mester duna cuenta pa su actuacion castigable. Den ambos caso tabata aerolinea Hulandes. Un hende asina e chens ta grandi cu ningun aerolinea lo acepte mas riba nan avion.
