Recientemente e lider politico di Boneiro, Elvis Tjin Asjoe di MPB, a topa cu Eugene Rhuggenaath di partido PAR di Corsou. Durante e encuentro a elabora tocante entre otro con e islanan ruman por traha mas cu otro. Manera ta conoci, despues di 10-10-10 e dos islanan no tin un relacion mas como mama y yiu, sino mas bien como ruman. Ta keda na cas isla awo con ta traha hunto, si nan kier traha hunto anto. Ta obvio cu, ora paisnan traha hunto a base boluntario, cu e relacion ta bira miho y mas estrecho compara cu ora mester traha hunto “forsa”.
“Nos ta orguyoso cu Boneiro a contribui cu e rais di politica di Corsou. E rais entre otro ta Miguel Pourier (q.e.p.d.), un di e gran lidernan Boneriano cu a yega di lidera Corsou y Antias Hulandes. Miguel Pourier tabata co-fundado y lider di partido PAR. Na tres ocacion Pourier tabata Minister President di Antias Hulandes. E lasonan familiar, cultural y comercial semper lo keda entre e dos islanan ruman Corsou y Boneiro”, asina Elvis Tjin Asjoe a duna di conoce despues di e encuentro politico.
Tocante Elvis Tjin Asjoe
Elvis Tjin Asjoe ta naci dia 9 di januari 1966 na Antriol. El a studia y caba HTS na Hulanda den area di IT. Na aña 2006 Tjin Asjoe, cu tabata conoci den comercio, a dicidi di integra den politica. El a aparece riba lista di partido UPB na aña 2007 y a bira Minister di Asuntonan Economico di Antias den Gabinete El Hage 1 y 2 te aña 2010.
Na aña 2011 Tjin Asjoe a logra mas voto riba henter e lista di UPB den eleccion di Eilandsraad, aunke e tabata number 3 riba lista. E tempo ey el a opta pa traha algun aña como Consehero di Gobierno di Aruba.
Na 2013 el a regresa Boneiro y a funda partido Movimiento Patriotico Boneriano (MPB) dia 15 di december. Den su prome salida, dia 18 di maart 2015, nan a resulta e partido mas grandi, pero toch a keda for di coalicion. Cuater aña despues, dia 20 di maart 2019, a bolbe sali e partido mas grandi, creciendo den voto ora tur otro partido a bay atras!
Tocante Eugene Rhuggenaath
Eugene Rhuggenaath ta naci dia 4 di februari 1970 y ta lider di Partido Alternativa Real (PAR). E tabata Minister di Asuntonan Economico den Gabinete Koeiman na aña 2016. Prome cu esey e tabata miembro di Parlamento entre aña 2003 pa 2009 y a asumi e funcion di Minister Presidente di Corsou desde dia 29 di mei 2017. Ta bon pa bisa cu PAR a resulta e partido mas grandi den eleccion na aña 2017.
Tocante Boneiro
Dor cu Alonso de Ojeda a descubri Corsou na aña 1499, ta pensa cu el a descubri Aruba y Boneiro tambe e mesun tempo. E tabata hunto cu Amerigo Verspucci y Juan de la Cosa. E ultimo aki a pinta un mapa di mundo na aña 1500 y eyden ta yama Boneiro como “Isla di Palo Brasil”. Desde colonisacion Hulandes, Boneiro semper tabata un ruman chikito pa e islanan ABC. Sinembargo, dia 10 di october 2010 (10-10-10) el a bira un municipio special di Hulanda hunto cu Saba y Sint Eustatius. Na cabes a keda Gezaghebber Edison Rijna, mientras cu nan tin un Gobierno Insular cu 3 Diputado y Eilandsraad di 9 miembro. Boneiro ta midi 294 km2 y cu un populacion di 19,408 habitante desde 1 di januari 2016. Mas o menos 80% di e poblacion ta Hulandes y mas o menos 60% di e poblacion ta naci na Antias Hulandes of Aruba.
