Boneiro a bolbe vota pa un Gobierno di coalicion

Ayera a tuma luga e eleccion pa Eilandsraad di Boneiro cu a termina te cu 9:00pm, pero resultado a bira conoci te awe mainta. E biaha aki tabatin dos eleccion, pa Conseho Insular di Boneiro y Kies College. Pa eleccion Conseho Insular di Boneiro un total di 9.054 persona a vota di cual 93 tabata voto invalido, 114 tabata votonan blanco y 8847 tabata voto valido. En total tabatin 8 partido riba lista di cual 6 tabatin e nominacion. A conta cu un postulacion di 126 candidato p’e 9 asientonan den Conseho Insular, cu na Aruba nos conoce como nos Parlamento.

ADV

Pa eleccion di Conseho Insular di Boneiro tabatin 11 urna destina, unda cu desde mainta trempan ciudadanonan cu derecho di voto a cuminsa bay vota. E resultado tabata como lo siguiente: Na urna 1 Jeugdhuis Jong Bonaire a vota 1250, 13 no valido, 17 blanco y 1220 vota valido; urna 2 Sentro di bario Tera Cora a vota 888, 9 voto no valido, 6 voto blanco y 873 voto valido; urna 3 Klas Kristu Bon Wadador a vota 822, 9 voto no valido, 2 voto blanco y 811 voto valido; urna 4 Sentro di bario Nikiboko a vota 995, 14 voto no valido, 15 voto blanco y 966 voto valido; urna 5 Sentro di bario Amboina a vota 740, 12 voto no valido, 12 voto blanco y 716 voto valido; urna 6 Sporthal Adventista a vota 841, 8 voto no valido, 13 voto blanco y 820 voto valido; urna 7 Kompleho Deportivo J. Nicolaas a vota 996, 11 voto no valido, 11 voto blanco y 974 voto valido; urna 8 Sentro di bario Nort di Saliña a vota 733, 9 voto no valido, 12 voto blanco y 712 voto valido; urna 9 Sociedad San Antonio de Padua a vota 515, 3 voto no valido, 5 voto blanco y 507 voto valido; urna 10 Tia Sani a vota 741, 2 voto no valido, 17 voto blanco y 722 voto valido; urna 11 Urna Mobil a vota 533, 3 voto no valido, 4 voto blanco y 526 voto valido.

Partido MPB di Elvis Tjin Asjoe a gana e eleccion di Boneiro cu 3576 voto, cu ta bon pa 40.4% di e electorado, cu ta traduci den 4 asiento den Conseho Insular. Partido PDB (Demokrat) di Clark Abraham a haya 2130 voto cu ta 24.1% cu ta bon pa 3 asiento. E partido UPB di James Kroon a logra 1798 voto cu ta 20.3% y bon pa 2 asiento. E cantidad di votonan cu partidonan EN, FSP y 1UPP a ricibi menos di 6% cada uno di votacion.

Mester menciona cu den eleccion di aña 2014 e resultado tabata cu MPB di Elvis Tjin Asjoe a logra mas voto pero a parti e asientonan toch na 3-3-3. Durante e ultimo 4 añanan Boneiro a pasa den hopi instabilidad politico pasobra tabatin un miembro cu cada tanto luna tabata cambia di banda den Conseho Insular y asina Gobierno tambe ta keda cambia. A pensa cu e biaha aki un solo partido lo haya mayoria, pues 5 asiento pero na final esey toch no a logra, pa cual coalicion awor ta inevitabel.

Segun Gezaghebber Edison Rijna, e dia tabata largo y tabatin diferencianan chikito den 2 urna. Esey a pone cu no ta tur cos ta cuadra riba papel y esaki no tin nada di haber cu algo straño of di a kibra ley, pero door di cansancio. Hunto cu e presidentenan di urnanan a repasa y sea trece e resultadonan of como presidente lo por a pidi un reconteo mirando e diferencianan tabata chikito entre 2 urna. Na final partido MPB a gana e eleccion di Boneiro.

Comments

comments