Ku satisfakshon promé minister Eugene Rhuggenaath i premier Mark Rutte ta wak bèk riba un eksitoso konferensia tokante posibilidatnan pa invertí na Kòrsou. E konferensia ‘Bon Biní for business ‘ a tuma lugá djaweps den e prestigioso Sociëteit de Witte na Den Haag.
E dos promé ministernan, ku a tuma e inisiativa pa e konferensia, tabata tei na Sociëteit de Witte pa yama un bon biní na representantenan di diferente sektor komersial Hulandes. E konferensia a konta ku presensia di hopi negoshante for di Hulanda i Kòrsou. Durante e konferensia di un dia, a papia tokante posibilidatnan ku tin pa inverti i pa hasi negoshi na Kòrsou.
A organisá e konferensia ku koperashon di ministerio di Desaroyo Ekonómiko, organisashon hulandes di dunadónan di trabou VNO-CNV i Kas di Kòrsou. Tabatin presentashon di diferente kompania manera CPA, Damen Shipyards, Aqualectra, CTB, Cinex i CDM Holding for di Kòrsou. Nan a trese e posibilidatnan ku Kòrsou ta ofresé den kada sektor.
Den e parti mainta di e konferensia, minister di Desaroyo Ekonómiko, Steven Martina, a presentá na sektor privá Hulandes su vishon i plannan. Di parti di Hulanda a partisipá sekretario di estado pa asuntunan di Reino señor Raymond Knops, representantenan di Buitenlandse Economische Betrekkingen, Rijksdienst voor Ondernemend Nederland (RVO), MKB di Hulanda i tambe representantenan di instansianan sientífiko manera TNO.
Ku e instansia sientífiko TNO a firma un akuerdo di koperashon. Den su charla promé minister Rhuggenaath a refirí na TNO komo un bon ehèmpel di un organishon renombrá ku ta duna kontenido na e konfiansa ku tin den pais Kòrsou. Durante e konferensia CPA tambe ofisialmente a sera un akuerdo ku Port of Rotterdam. Esaki bou di ouspisio di ministerio di Desaroyo Ekonómiko. CPA i Port of Rotterdam a palabrá di bai eksplorá en ekstenso tur benifisio di nan koperashon.
E dos akuerdonan aki ta ehèmpel di mas proyekto ku lo kristalisá den tempu binidero pa stimulá ekonomia. Durante e konferensia a infatisá e potensial di Kòrsou komo un destinashon pa invertí i hasi negoshi. A mustra na Hulanda ku aworakí ta e momento pa tuma akshon. ‘Bon Bini for business’, tabata e promé konferensia den e kuadro aki. Otro aña lo bai tin un konferensia mas asinakí na Kòrsou.
