Bomberonan a corta auto pa saca pasahero pega despues di accidente

Awe marduga pa 4:10am a sosode un accidente frontal entre un Toyota Yaris blanco y un Mitsubishi Lancer shinishi, net pariba di Isla de Oro. E Toyota Yaris tabata bayendo direccion San Nicolas y e Mitsubishi Lancer tabata bayendo Playa.

Pa un motibo of otro chauffeur di e Yaris a bay na su man robes y dal frontal den e Lancer. Den e Mitsubishi Lancer tabatin 2 persona y den e Toyota Yaris 1. E daño material riba ambos auto tabata hopi. Tur 3 persona a keda herida, di cual e pasahero den e Mitsubishi Lancer a keda pega den auto.
Polis a presenta na e sitio y di biaha a pidi asistencia di tanto Ambulance como Brandweer.

Bomberonan a forsa e porta di e Lancer, hala e sienta pa por a saca e pasahero cu tabata pega den e auto. Paramediconan di ambulance a atende cu tur herido y despues transporta nan pa hospital pa mas revision medico.