Diadomingo mainta bomberonan a drenta buraco pa rescata un cacho. Esaki ta un buraco cu parce a wordo coba un dia prome. Den Pastoor Hendrikstraat a coba e buraco y fundeshi pa construccion di un cas.
E cacho di un bisiña a cay den e buraco y no por a sali mas. A avisa Polis y bomberonan cu a presenta. E miembronan di bombero a pone trapi y bombero Tyrone Rafael a baha den e buraco y rescata e cacho.
Ora el a bin halto cu e cacho tur esnan presente a bati man. Un aplauso fuerte y di curason a bay pa e rescate aki. Regularmente bomberonan ta rescata bestia cu ta cay den buraco.
Den forma tactico ta saca e bestianan pa asina evita daño na nan curpa. Esaki tabata un rescate exitoso cu a wordo aplaudi. E cacho tabata ok y su doño cu tambe tabata presente a gradici bomberonan pa yuda rescata su cacho.
