Harold de Cuba, miembro di Management Team di Cuerpo di Bombero a combersa cu TREMPAN diaranson merdia y a comparti cu, di nan parti, tambe a tuma tur e pasonan necesario pa atende cu cualkier eventualidad. Esey ta nifica cu na post di Bombero na San Nicolas, Aeropuerto y Tanki Flip tabatin capacidad maximo di personal, mientras cu a revisa tur unidad y ekipo disponibel pa ta cla pa sali.
Central di emergencia 911 tambe ta ubica na e base di Cuerpo di Bombero na Tanki Flip. Y tambe a tene debido cuenta cu un posibel aumento den yamada di ciudadanonan cu tin mester di asistencia. For di experiencia di otro oportunidad caminda Aruba a pasa den clima poco extremo, Cuerpo di bombero sa cu e asistencianan mas frecuente ta relacion cu molester di awa y hende grandi cu no por keda den cas mas.
Di parti di Cuerpo di Bombero tambe a boga pa tin un cooperacion entre bisiñanan caminda tin mester pa fluho di awa core sin problema. Sinembargo, no tur caminda ta mescos y Aruba ta conoci pa tin un infrastructura cu no ta soporta hopi awe. Manera de Cuba a splica, no ta tur area residencial ta mes fácil pa e awa por haya caminda di bay. Particualrmente complehonan di viienda ta mas complica y ta rekeri di mas esfuerso pa soluciona.
Areanan conoci como esunnan cu mas problema di awa manera Pos Abou y Pos Chikito, ta ubica pump cu en berdad ta yuda, pero te na cierto punto, segun de Cuba ya cu simplemente ta pusha e awa otro caminda por no tin en realidad unda pa bay, pesey ta pidi hende pa pone obhetonan valioso na un luga halto pa evita daño.
