Bombero Mickel Tromp a fayece den brasa di su mama

16453

Mickel Tromp, un “Bevelvoerder” conoci cu 28 aña di experiencia den Cuerpo di Bombero, a fayece ayera nochi lat na Hospital. El a traha den dia pero anochi a sinti su curpa malo y na dado momento mester a bay Hospital. A purba reanime pero no a logra y asina a fayece na Spoedeisende Hulp na Hospital.

E mama a conta nos cu ayera nochi, na dado momento Mickel a lanta for di soño debi na dolor den pecho. Cu awa na wowo el a yega cerca su mama y a pidi’e pa yud’e pasobra e tin hopi dolor y tabatin gana di saca. E mama a ofrece un Paracetamol cu awa pa e bebe. El a bay den baño pa saca y a regresa yorando cu su mama cu e tin hopi dolor. E mama y tata a sali mesora cu nan yiu di 50 aña di edad pa Hospital.

Pa hopi aña Mickel Tromp a traha como Centralista na Centro di Alarma 911 na Cuerpo di Bombero.

Remarcablemente, na caminda pa Hospital den auto, Mickel a yama su coleganan na “911” na Cuerpo di Bombero pa informa nan cu e ta bayendo Hospital pasobra e tin hopi dolor den pecho. Despues cu el a cera e celular, e mama a conta cu su yiu a haci un movecion straño y a scucha un zonido peculiar y a bay for di tino.

Na yegada na Hospital, e mama a keda dal’e na su cara pa e reacciona pero no tabata bin bij. E mama na grito a pidi e security guard di Hospital pa por fabor yud’e cu su yiu. E mama a conta nos cu e atencion di henter e ekipo na Hospital tabata excepcional. Di security guard pa nurse y dokternan, tur a sali pafo cu cama pa yuda carga su yiu, dune prome auxilio y haci tur esfuerso pa e bin bek.

Durante 40 minuut largo a brinda asistencia na Mickel Tromp den Spoedeisende Hulp na Hospital. Na un dado momento, e porta a habri y tanto e mama como e tata tabata sperando un bon noticia di e dokter. Pero, for di momento cu e dokter a sak su cara abou y a brasa e mama y e tata pareu, nan a realisa cu nan yiu homber a fayece asina ey. Dokter a conta cu a haci tur lo posibel, pero no a logra reanima Mickel, kende a sufri di un ataca masivo di curason.

Mickel Tromp a bay laga 2 yiu atras, ambos bibando na Hulanda. E tabata traha den “Afdeling preventie” na Cuerpo di Bombero y ta parti di e team di “Task Force Bedrijven”. Su funcion tabata “Preventie medewerker” den rango di “Bevelvoerder”.

Bombero Mickel Tromp durante un training special den exterior.

Mickel Tromp mes ta un hungado di futbol conoci pa e ekipo di Bubali na Noord. Su tata Sony Tromp, ex-cahero di Lands Ontvanger, tambe semper a hunga pa SV Bubali. Henter famia ta di luto awe, pa e morto inespera di Mickel.

Awe mainta 24ora.com tabata presente na e cas pa consola e famia. Su mama a bisa cu esaki ta e dolor di mas grandi pa un mama. E alegria semper di un mama ta di mira nan yiu nace y e dolor mas grandi ta ora mester dera un yiu. Hopi forsa na famia Tromp cu perdida di Mickel, un gran amigo di nos. Cu Mickel sosega na paz.