E autoridad di weganan di suerte Hulandes (KSA: Nederlandse Kansspelautoriteit) a impone un boet di 350 mil euro riba un empresa di weganan di suerte estableci na Corsou, CyberRock Entertainment NV y tambe riba un sucursal Honeydew Trading Limited na Cyprus. Motibo di e boet aki ta door di brinda weganan di suerte na consumidornan Hulandes atrabes di websitenan manera play2wincasino.com y supremeplay.com.
E websitenan aki ta na idioma Hulandes. Tur otro website ta habri, despues di a log in cu un cuenta di e usuario, den e idioma Ingles y Hulandes, na luga di e idioma Ingles. Segun ley Hulandes, no ta permiti pa weganan di suerte wordo brinda na consumidornan Hulandes.
Pa hopi aña caba KSA ta luchando contra di e fenomeno aki y ya a yega di duna megaboet cu casi nunca ta wordo paga, pasobra e propietario berdadero tras di e asociacionnan aki, ta perde for di bista mesora.
CyberRock ta opera a base di un permiso otorga pa e Gaming Control Board y ta wordo maneha pa Carmanco NV, un trustkantoor na Willemstad, cu ya caba a yega di haya boet door di KSA pa casinonan online. Director George Praag hasta a yega di haya un advertencia oficial for di KSA door di facilita actividadnan ilegal desplega pa su clientenan.
E industria ilegal di weganan di suerte na Corsou ya pa varios aña tin atencion di politiek Den Haag. Parlamentario Ronald van Raak (SP) varios biaha a haci preguntanan por escrito, pero cada biaha e ta haya tende di mandatarionan cu ta trata aki di un asunto autonomo di pais Corsou. KSA mes a purba di yega na acuerdonan cu e supervisor Curasoleño.
E enfoke di e ofertanan ilegal online ta un di e prioridadnan di KSA. Presidente Rene Jansen di e Hunta directiva: Hopi Hulandes no sa cu weganan di suerte online ta ilegal na Hulanda. E proteccion di e consumidor ta un meta importante di KSA, fuera di e prevencion di e adiccion riba weganan di suerte y e combatimento di ilegalidad. Bet cerca un proveedor ilegal ta implica cu e consumidor no ta wordo protehi. E no ta sigur di un wega husto. Tampoco no tin control riba participacion di gruponan vulnerabel, manera menornan.
“Proveedornan por haci nan websitenan facilmente “invisibel” pa bishitantenan cu un IP-adres Hulandes, e asina yama geoblocking.
Ta sospecha cu parti di e sector di wega di Corsou ta den man di rednan criminal internacional cu ta uza casinonan online pa labamento di placa di ingresonan di trafico di droga, trafico di arma y trafico di hende y ta envolvi den financiamento di organisacionnan terorista. Ta supone cu morto di e popular politico Curasoleño Helmin Wiels na 2013 ta conecta cu su empeño pa atende cu e asina yama “gokmaffia” riba e isla.
Na April di e aña aki, Corte na Willemstad a condena e trustkantoor Carmanco NV como manehado di un (of otro) exploitant di un webcasino: Stacktrace NV. “Carmanco a cumpli cu su tarea como manehado y ademas ta seriamente responsabel y por lo tanto a actua ilegalmente,” segun Hues cu a condena e trustkantoor pa paga basta placa na un partido afecta. Carmanco ta forma parti di Curacao Trust Management-group.
Despues cu KSA a hala nan atencion na 2015, e doño/director George Praag, a priminti di reflexiona riba e trabao pa e operadornan di weganan di suerte online, pero, manera cu por a mira, el a bay bek na su custumbernan bieu.
Carmanco tin un licencia di Banco Central di Corsou y St. Maarten pa opera como un trustkantoor.
