Boa den mata a tene dos señora secuestra den nan cas

Diadomingo mainta dos señora, cu ta biba nan so den cas na Bruynewijk, a bati alarma pasobra cu den nan cura, den un mata, tin un boa lora y nan ta spanta y no por sali for di cas.

Polis di San Nicolas a bay na e sitio. Dos dama polis a dicidi di bay tambe na yuda e señoranan.

Pero mientras tanto, durante cu nan tabata tey, mesora tambe a pidi pa por fabor manda dos colega mas pa reforsa nan pa asina nan gara of mata e boa y asina e dos damanan den cas por ta trankil.

Esey a sosode tambe. Dos unidad, cuater polis a bay pa bringa cu e boa. Finalmente nan a logra tambe pa mata e boa cu tabata den e mata, un boa basta grandi.

Asina tambe e habitantenan, e dos damanan, a keda mas trankil den nan cas, pasobra nan tabata tin miedo di e colebra aki cu tabata cerca di nan cas y nan mester a cera nan mes pasobra nan no ta gusta colebra.

Polisnan a dicidi e ora pa mat’e, bin cun’e pafo, hink’e den un saco di sushi y finalmente bandona e sitio, lagando tambe e trankilidad den e cas, na Bruynewijk cerca dos señora cu ta biba den cas.