Bo tabata sa… Cu Aruba tin un lista ‘positivo’?

Desde 2004 Aruba tin un lista ‘positivo’ di remedi. E lista aki ta bisa e dunadonan di cuido cua remedinan AZV ta cubri. E ta un lista amplio. Den prome instante ta wak si e remedi ta un bon remedi y na di dos luga ta wak e prijs di e remedi (eficiente, bon prijs).

Categoria di remedi

E Lista Positivo tin hopi remedi pa trata diferente malesa, entre otro: remedi pa trata e stoma, tripa y of higra, remedi pa trata malesanan di sanger, malesanan di curason y ader, malesanan di cuero, malesanan relaciona cu e sistema urogenital y di riñon, remedi pa trata malesanan ocasiona door di microorganismo (parasito, bacteria, virus, schimmel), remedi pa trata malesanan di weso y musculo, remedi pa trata e sistema respiratorio y mucho mas.

Advies Commissie Geneesmiddelenlijst Aruba (AGA)

E Lista Positivo ta un lista dinamico. Esey ta nifica cu constantemente ta monitoria e desaroyonan den mundo farmaceutico. Remedinan nobo ta bin riba mercado, otronan no ta wordo fabrica mas. Esey ta nifica cu e lista ta wordo adapta segun e desaroyonan. E Lista Positivo ta wordo compila y manteni door di Advies Commissie Geneesmiddelenlijst Aruba (AGA), cual ta un comision cu a wordo instala door di e Minister di Salubridad Publico.

Tarea di AGA

AGA tin e tarea pa duna conseho tocante tratamento medico cu enfasis riba remedi. AGA ta sigui den principio e criteria di Zorginstituut Nederland, tanten cu esaki ta aplicabel pa e situacion di Aruba. Zorginstituut Nederland ta mantene e publicacion di e Farmacotherapeutisch Kompas cu a wordo traha bou di responsabilidad di e Comision di Cuido Medico Farmaceutico di Hulanda.

Consulta Farmacoterapeutico (FTO)

Manera ya a splica, tin hopi diferente sorto di remedi. P’esey dokternan di cas y boticarionan tin regularmente consulta cu otro tocante prescripcion y otorgamento di remedi. Esey ta yama ‘consulta farmacoterapeutico’ of den corto ‘FTO’. E consulta farmacoterapeutico aki tin como meta cu e dokternan di cas y e boticarionan ta siña di otro y ta traha palabracionnan cu otro. Consecuentemente e colaboracion entre nan (dokternan di cas y boticarionan) ta beneficia e pashent paso cada pashent ta ricibi e remedi di mas adecua pa su persona dentro di e situacion cu e pashent ta e momento ey. Ta traha continuamente na bienestar y salud di e pashent.

Busca remedi

Ora bo dokter di cas of specialista receta remedi, bo ta acudi cerca bo botica pa entrega e receta y bo botica lo duna bo e remedi. Den caso cu e botica no tin e remedi pa bo, e botica (boticario) mester comunica cu bo dokter pa evalua cua otro remedi bo por haya.