Hospice Atardi ta un luga unda por ricibi cuido paliativo esta cuido di un malesa cu (ya) no tin cura. E meta principal di cuido paliativo ta dirigi riba mantene e calidad di bida y unda ta posibel mehora esaki.

Tambe ta enfoca riba reduci sufrimento di e persona, maneha e sintomanan di e malesa. Hospice Atardi kier duna cuido na e huespednan na un manera mas respectoso y cariñoso posibel.

Pues e cuido tin atencion pa diferente aspecto, esta e parti fisico, social, emocional y spiritual. E cuido generalmente ta wordo duna door di boluntarionan, enfemeronan y dokternan di cas. Banda di tur esey, e cuido ta dirigi riba guia pa e famia tambe, unda ta yuda e famia den aceptacion di e malesa sin cura y ta yuda e famia door di haci e tarea di cuido pa nan ser keri hunto.

Algo bunita ya cu e persona mes y su famia por sinti nan mes mucho mas trankil. Ta sinti un alivio di por pasa tempo hunto, di por ofrece e miho cuido na nan ser keri.

Pa bin na remarca

Un persona cu kier bin na remarca pa Hospice Atardi, ta e persona cu ta den su ultimo fase di bida, unda tin un malesa incurabel y unda e expectativa di bida ta menos 3 luna. Esaki kisas ta zona duro of fastioso, sin embargo Hospice Atardi ta un cas cu ambiente di hogar, ‘casi manera nos mes cas’. Di un banda Hospice Atardi ta ofrece trankilidad pa e huesped pa medio di bon cuido cu hopi cariño. Di otro banda e ta ofrece e famia un paz y tranquilidad ya cu e tarea di cuido pa e persona ta wordo haci conhuntamente cu e famia. Importante dentro di e proceso aki ta cu boluntarionan , enfermeronan y dokternan di cas conhuntamente ta respeta autonomia di e huesped.

Contacto

Pa haya mas informacion, por comunica cu Hospice Atardi na 5840085 of [email protected] por bay riba nan nan FB-page Fundashon Hospice Atardi of riba nan  website www.hospiceatardi.com .

Entre tanto, Hospice Atardi a cumpli 1 aña di existencia riba 17 di november ultimo. AZV ta manda hopi pabien pa e team completo di Hospice Atardi.

Comments

comments