Diaranson, 22 di januari 2020, di 6.30 pa 9.30 di anochi lo tin e actividad “Pa un bon comienso di aña 2020’ na Biblioteca Nacional Aruba na George Madurostraat, Oranjestad.
Biblioteca Nacional Aruba, Departamento di Cultura Aruba hunto cu gestor cultural Mirto Laclé a uni pa presenta un actividad cu un programa multidisciplinario pa duna comienso na un bon entrada den e aña nobo 2020.
Durante e programa lo tin enfoke riba diferente disciplina entre otro Literatura , Arte, Cultura, Linguistica y Educacion en general. Lo tin presentacion di charla, musica, declamacion y sketch. E programa lo consisti di algun orador, entre otro Sidney Joubert for di Corsou cu lo hiba charla tocante Comishon principal di ortografia di Papiamento di Siglo XX, lo presenta e buki ‘E cuentanan di Nanzi’ pa Nilda Pinto Jesurun version Papiamento-Ingles y lo enfoka riba 2 obra di Pierre Antoine Lauffer.
Islanan Aruba, Boneiro y Corsou, aglutina pa Papiamento-Papiamentu, lenga mama di e islanan ariba menciona lo ta central. Lo pone enfoke riba personanan significante riba tereno cultural cu a nace na 1918 -1919-1920. Pues ta trata di Recuerdo di mas cu un Siglo. Lo continua cu Rescate di Memoria, pasobra abo tambe ta conta. Lo tin tributo na memoria di Tony Thijsen, Embahador Musical Arubano nacional y internacional. Publico en general ta keda cordialmente invita pa asisti na e anochi cultural aki. Entrada ta gratis.
