Desde ayera nochi e PDF File cu nomber di tur pashent cu a test positivo pa Covid-19 a lek y ta core via whatsapp. Esaki ta un berguensa nacional y un blunder di e sector di cuido cu tin como tarea pa salbaguardia informacion secreto di pashentnan. Minister Dangui Oduber, encarga cu e cartera di Salubridad Publico, tin un tarea specifico aki pa yega na esun(nan) responsabel pa e hecho aki, pasobra ta nomber, adres, fecha di nacemento y condicion di Covid di algun shen ciudadano ta lastra riba caya ki.
Ta for di algun siman pasa caba por a premira cu internamente tin hopi pa drecha. Prome cu departamentonan di Gobierno por “claim” cu nan tin e situacion bou control, ta hopi mester sosode pa corigi eror tras di eror administrativo den e proceso. Asina por a mira cu ora ciudadanonan yega nan informacion den e Health App, cu ora e sincronisa cu LabHOH e dia di bo nacemento ta cambia cu un dia prome. Pues si Bo fecha di nacemento ta por ehempel 10 di augustus 1970 e lo bira 9 di augustus 1970. Tambe a nota cu den e proceso, aunke cu e ciudadano mes ta yena su informacion den e app, cu na DVG nan ya hinc’e manualmente den nan sistema y ta comete eror.
Asina por mira den e lista nombernan fout skirbi of sin hoofdletter, pa duna un idea di e nivel y preparacionnan di e “data entry” nan. Cu bo data ta mal hinca, di mes cu e servicio su tras tambe ta di calidad inferior. Tin pashent, den nos redaccion di 24ora.com mes cu a haya yamada di DVG pa bisa nan number di cas pasobra nan tin e adres yena na caya so, sin number. Otro nan no tabatin informacion ni di adres ni number di telefon di pashent of a yena informacion robes. Claro cu e “contact tracing” e ora hamas por ta bon ni confiabel!
E controlnan na cas tambe a resulta den un berdadero “joke” pasobra ta yega un pickup di DVG pita pafo. Nan ta bel pa Bo djis para den porta di sala pa nan mira Bo y ta cla! No mester firma nada ni mustra ningun identificacion. Con sigur e “ambtenaar” por ta e ora cu ta e pashent corecto a señala? Con e por comproba na su hefe den DVG cu di berdad el a bishita e adres y a topa cu e pashent? No mester lubida cu Gobierno a haci e asunto aki castigabel penalmente, esta si Bo no ta na cas den isolacion of cuarentena. Pero, Gobierno no a percura pa un formula di control serio y confiabel tampoco.
Cu e eror cometi aki, di bay email of whatsapp lista di informacion ta mustra cu e empleadonan publico encarga cu e trabou aki no a tuma nan funcion na serio. Secreto di pashent ta bon regla den ley y tin hende ta core risico aki di sea perde nan trabou of haya nan den problema cu husticia.
Riba e lista no por descifra ainda ken a saca e documento, pero obviamente no tin hopi instancia cu ta maneha e lista, tin informacion of tin acceso na dje. Pues dje dificil e no lo ta tampoco pa yega na e departamento concerni y check ken a sac’e for di nan computer. E documento ta original pues no ta un potret, cu ta hacie mas facil pa investiga.
Un cos si….un hende mester responsabilisa pa e blunder aki!
