Bloedbank cu Opendag riba Dia Mundial di Donante

Tur aña riba dia 14 di Juni, paisnan rond mundo ta celebra Dia Mundial di Donante di Sanger. E dia aki a wordo estableci desde 2014 pa por trece conscientisacion na comunidadnan y tambe na mundo henter riba e importancia pa tin sanger di calidad, sanger di nivel halto, pa por salba bida.

E instancia encarga cu esaki na Aruba ta “Stichting Bloedbank”. Pa por yega na e sanger y e cantidad necesario pa salba bida, mester di donantenan di sanger.
Stichting Bloedbank tin mester di donante y esnan cu ta desea pa bira un donante, por acudi semper na Bloedbank pa cuminsa cu e proceso aki, Jurette Croes, PR di Departamento di Salud Publico a splica den e conferencia di dialuna mainta.

Den e conferencia di prensa tabata presente Fabian Werleman di Bloedbank, kende ta invita tur hende pa diabierna awo, dia 14 di Juni, cual ta dia Internacional di Donante di Sanger pa bin na nan opendag. Aki ta bay demostra kico tur ta haci cu e sanger cu ta duna.
Tambe nan kier mustra riba e ultimo desaroyonan cu tabata tin na banco di sanger, p’asina trece un producto di calidad halto pa e pashentnan, segun e standardnan internacional cu tin.

Bloedbank Aruba tin 1600 donante cu ta activo, cu ta dunando sanger, cu ta sosteniendo un pueblo di un tiki mas di 100 mil habitante. Werleman ta desea pa por  hisa e cantidad di e donantenan. Ultimo aña, banco di sanger a inverti hopi den hisa nan calidad den forma di aparatura. Tambe nan a cambia nan sistema di dunamento di sanger pa un sistema cu ta produci productonan mas halto. Tambe a bin cu un aparato cu yama Mirasol, cu ta un aparato cu ta mata tur virus cu por ta den e producto. Por menciona virusnan manera esnan di Zika y Chikungunya. Tambe Werleman a menciona di un otro desaroyo, cual ta e programa nobo cu a cuminsa cun’e dia 2 di December 2018. A cuminsa cu un programa cu yama Idelfin, cual ta un programa cu ta monitorea e sanger for di ora cu e wordo duna, te ora cu keda cla pa bay na e pashent. Esaki ta un adelanto masha grandi mes pa banco di sanger.

Dia 14 di juni nan ta habri pa publico di 9’or di mainta pa 3’or di atardi, y ta invita pueblo pa acudi y conoce e trabou cu ta haci den Bloedbank. Por mira tur cos. Eynan ta bay tin un rondleiding den Bloedbank, caminda cu por mira e aparatonan, como tambe e programa di computer nobo y naturalmente esnan cu ta interesa, por bira miembro, mirando cu ta buscando donantenan nobo. Riba e dia aki por acudi na Bloedbank, duna informacion y asina aumenta e cantidad di donantenan cu tin.
Finalmente ta felicita tur donante y exdonantenan di sanger riba e dia aki, 14 di Juni, pa e noble gesto cu nan ta haci.