Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua riba veldnan na Pos Chiquito. Den categoria A-Klas tabata tin un tanganaso di wega momento cu Black Joker y Blackhawks a faha otro te final.
Black Joker perdiendo 7-6 te den bom di 6 inning ta rally y ta laga Blackhawks riba tereno 8-7. Black Joker como equipo a bati di 28-10 pa un averahe di 357 mientras Blackhawks a bati den conhunto di 27-12 pa un averahe di 444. Blackhawks ta anota 1 careda den promer inning, 4 careda den tercer inning y dos careda mas den cabez di 6.
Black Joker ta anota 1 careda den promer inning, 3 den di 3 inning, 1 den 4 y 1 den 5 pa despues rally pa 2 careda den bom di 6 inning seyando e victoria. Randolph Maduro ta conecta un cayonaso riba e backhand di e shortstop kende no por a bin kla cune y asina Ashwi Fekliciano ta anota e careda pa laga Blackhawks den tereno.
Boxscore final Black Joker 8 careda, 10 hit, 0 error y ta laga 8 coredor na base. Blackhawks 7 careda, 12 hit, 4 error y tambe ta laga 8 coredor den circulacion. Mihot bateadornan pa Black Joker ta Ashwi Feliciano, Burton Sintjago y Ingemar Adamus tur a bay di 2-1, Roderick Simon di 3-3 cu 2 careda anota mas un doblete, Glenrick Marchena 3-2 incluyendo un doblete.
Pa Blackhawks a destaca den caha di bateo Yeisid de Kort 2-1, Clay Shipley aportando na su propio causa di 3-2 cu 1 careda anota mas 2 rbi, Meldrick Solognier di 3-3 cu 1 doblete mas 1 rbi, Jomir Vrolijk di 3-2. Glenrick Marchena ta bay 3 inning lansando 33 bola, 24 strike pa un total di 57 pitch, permitiendo 5 careda tras di 5 hit propinando 2 ponche y ta regala 5 base por bola.
Lorenzo Maduro ta drenta releva Glenrick y btambe ta bay 3 inning, lansando 8 bola, 28 strike pa un total di 36 pitch permitiendo 2 careda, 7 hit y no ta regala base por bola. Clay Shipley mester consola su mes cu e derota lansando 6 inning, 31 bola, 61 strike pa un total di 92 pitch enfrentando 32 bateador permitiendo 8 careda, 10 hit y ta regala 2 base por bola.
Weganan official di campeonato ta continua dialuna awor pa 715 riba veld na Pos Chiquito momento White Joker vs Blackhawks y pa 9pm Piratas vs Black Joker cual ta mustra di bira un tremendo partido. Diamars 28 di Mei na Dragon Hitters pa 715pm Logros vs Piratas pues si Piratas mantene su invicto dialuna tanto Logros y Piratas posiblemente port a 4-0 y aki si un invicto mester cay.
Pa 9 pm White Joker vs The Prodigies pa asina termina promer buelta complete den categoria AA y A-Klas. Fanaticada jega tereno bin apoya Bo equipo prefer.
