Banco Central di Aruba a haya informacion cu nan a gana e “IBNS 2019 Bank Note of Year Award”. Ta asina cu “International Bank Note Society” (IBNS) a anuncia awe cu su miembronan a scoge Banco Central di Aruba pa e prestigioso premio anual di “Bank Note of the Year Award” pa aña 2019. E biyete nobo di Aruba di 100 florin ta e diseño ganado di e premio.
A introduci e biyete nobo di 100 florin na juni despues di algun aña di preparacion intensivo y den cooperacion estrecho cu diferente stakeholder local. A splica e color di e biyete aki cu ta representa e color di e habitat natural di diferente especie di e flora y fauna di nos isla.
Di tur e biyetenan nobo introduci den 2019, e miembronan di IBNS a nomina 22 pais pa votacion. Den su comunicado, IBNS ta papia hopi positivo di e biyete nobo di Aruba. “E diseño unico ta capta bista y ta un balans efectivo den combatimento di falsificacion y gastonan di produccion. A envolvi scolnan local y comunidad completo den transicion pa yega na e biyetenan nobo.”
Jane Semeleer, Presidente di BCA a enfatisa cu “Ta bisto cu nos a logra crea un bunita serie di biyetenan. Nos tin un di e serienan di biyetenan di banco mas moderno y innovativo na mundo. Nos ta orguyoso di nos vision – pa haci Arubianonan orguyoso di nos vision y mustra mundo e rikesanan di Aruba – cu a conduci na e premio pa e biyete di 100 florin”.
Ta papia di un app gratis lansa pa comunidad “Aruba su florin”. E app aki ta permiti pa siña di tur e aspectonan di siguridad di e biyetenan den forma di wega. Miriam Gonzalez, director ehecutivo di BCA: “Despues di e introduccion exitoso di e biyetenan nobo aña pasa, e hendenan a custumbra e aspecto nobo di esakinan. Awo ta e momento corecto pa laga e comunidad local dal un paso dilanti pa familiarisa nan mes cu e biyetenan nobo, cu ta repasa e aspectonan di siguridad y pasa un momento agradabel haciendo esaki. E app ta tanto educacional como entretenido, contando e storia tras di e creacion.”
Pa mas informacion riba e biyetenan por subi: https://www.cbaruba.org/newbanknotes2019/ – Por baha e app for di App Store of Google Play buscando pa “Aruba su Florin”.
