Habitantenan di Tanki Leendert tin un molester basta grandi den e bario. Loke tin e habitante hostina, cu pa e ultimo tres dianan tin hopi stof. El a keha. Tur hende ta bisa cu Aruba tin pata pata di stof. No a tuma e habitante na serio, pero al fin y al cabo tur cos a mustra ta manera un desierto di Sahara.
A cana rond den e bario y a bin saca afo cu tin un area caminda cu ta desmantelando un edificio cu tin den vecindario y e stof ta manifesta. Cachonan di e habitante ta full cubri cu stof, nan ta haci fastioso y kier ta paden. Constantemente nan tin cu bari. Ta cada cuater ora sino e stof ta acumula. E cas pafo ta yen di stof, auto ta sushi. No ta e habitante aki so, sino e bisiñanan tambe. A yama polis den varios ocasion, pero no a tende nada mes di nan. Trucknan grandi ta bay bin, cada 20 minuut. Ta trata aki di un truck di Atco, cu su containernan di sushi ta pasa eynan. Tin algo grandi ta sosodiendo y ta pidi pa check esaki, pasobra no ta manera di traha.
Si nan ta bezig ta rosando un tereno, mester pone e bisiñanan na altura.
Si keda un rato pafo di cas, ta cuminsa tosa. E stof ta asina fini cu mester tin un efecto na salud di hende.
E visibilidad no ta mucho cla tampoco. Por mira sigur un nubia di stof den e ambiente. Awo con e habitante tin cu haci cu su cas? E cos aki no ta normal, segun e habitante. Ken ta responsabel pa esaki, mester haya sa esaki.
Operador di mashin
E habitante a yama polis. Bisiñanan a yama WEB, avisando di e tubo cu a wordo kibra door di e tantisimo makinaria pisa cu ta circula eynan. No a tende nada bek. Si bay riba e tereno, e manehadornan di e makinaria, ta bisa nan cu nan no ta responsabel, y ta ordo nan ta haya. Esun cu ta duna ordo mester para responsabel y mester busca un solucion. Tin un truck di awa, pero e tereno ta mustra seco seco. Si cada binti minuut tin un truck di sushi, un container di desperdicio ta pasa, e ora sa caba e cantidad di material cu nan ta saca, cu un truck di awa para eynan, no ta suficiente. E truck di awa no ta bezig ta spuit awa tampoco.
Un desierto
E habitante tin tres dia cu e ta bibando den e dilema aki. E ta spera cu e cos aki caba pronto y ta spera cu e compania trahando eynan, ta un bon bisiña y splica kico ta pasando. Compensa nan, si nan tin cu spuit nan cas bek. Loke nan ta haciendo ta poniendo un trabao extra cu nan ta poniendo riba e bisiñanan, cu no ta husto, e habitante a conclui.
