Tabata algun minuut prome 8’or di anochi ora cu habitante di un cas na Sero Patrishi a mira un homber ta “loer” den su cas cu intencion pa horta. Mesora a sali su tras pa wak kico tabata su intencion di berdad. E homber a spanta y a cuminsa core na pia. E habitante a core su tras pero no a logra yega mucho leu. E homber sospecha di ta un ladron activo a cobre bula den un cura di cas den e bario di Purun. E cacho den cura a ladr’e y mesora a activa habtitane di e cas.
A logra gara e homber y pon’e plat ariba vloer cu yudansa di e otro miembronan di cas. Polis a presenta na sitio y e transporte Policial a bin busca e homber y transport’e pa Warda di Polis. Despues cu Polis a termina cu e parti di declaracion di e habitantenan, a bay patruya den e area di Sero Patrishi, caminda cu a bin topa un RHD color oranje para ariba un tereno bashi. Ta sospecha cu e auto aki lo ta pertenece na e persona deteni. Mester remarca cu e lucha pa gara e ladron no tabata facil. E ladron a resisti pisa.
