Cifranan cu a drenta ta mustra cu Aruba a conoce un aumento chikito den e cantidad di bishitantenan crucero pa loke ta juli, 2019.
Ta papia aki di un aumento di 1.3%. Aruba Ports Authority (APA) ta raporta cu Aruba a experencia un volumen di bishitantenan crucero cu e porcentahe menciona, cual den cifra real ta un crecemento di 46.370 bishitante compara cu e 46.952 bishitante crucero di juli, 2018.
Ora mira e cifra di e cantidad di barconan crucero a yega Aruba, por nota cu el a keda practicamente mescos. Si aña pasa juli tabatin 16 barco cu a yega Aruba, e aña’ki esaki tabata 15.
E cifranan di e prome seis lunanan di aña 2019 en comparacion cu 2018 ta duna e siguiente resultado. Esaki a demostra un caida di 0.3%, bahando for di 483.615 pa 482.064 bishitante e añ’ki. E cantidad di barconan cu Aruba a ricibi tambe a baha for di 198 na 2018 pa 182 den e prome seis lunanan di 2019.
Cifranan riba e website di APA ta mustra cu januari tabata e luna di 2019, te cu awo, mas turista crucero a yega Aruba, cu un total di 128.425 cu a yega abordo di e 52 barconan a mara den waf. Aña pasa tambe januari, den e prome seis lunanan, tabata esun cu mas turista a yega, 108.298 den 53 barco crucero cu a mara den waf.
Si mira bon e cantidad di tripulantenan, cu ta posibel bishitantenan, ta hopi. Na juli 2019 e barconan cu a yega Aruba tabatin 165.458 tripulante compara cu e 158.669 tripulantenan cu a bini cu e barco den e prome seis lunanan di 2018.
