Resientemente Minister di Hustisia, señor Quincy Girigorie a risibí representantenan di e ofisina di United Nations High Comissioner for Refugees (UNHCR) pa e teritorio di Nort Amerika, Sentro Amerika, Karibe i Latino Amerika, pa un bishita di kortesia. UNHCR ta e organisashon internashonal ku ta defendé derechonan di personanan buskando asilo i kende ta rekonosé komo refugiado. E enkuentro ku UNHCR tabata unu ameno kaminda e representantenan di UNHCR a ofresé nan disponibilidat pa duna konseho, treinen i sosten pa kasonan di refugiado.
Retonan Minister Girigorie a mustra su gratitut pa e disponibilidat di UNHCR i a informá e delegashon di e pasonan ku Gobièrnu a tuma kaba pa manehá e situashon di refugiado i e retonan ku esaki ta trese kuné. Un di e retonan ta por ehèmpel ku Kòrsou no ta forma parti di e Tratado en kuantu Refugiado. Kòrsou na e momentunan aki ta husga di no ta kla pa forma parti di e Tratado aki mirando e responsabilidatnan ku e pais lo tin na momentu ku e bira parti di dje. Ademas, e peso finansiero ku esaki ta trese kuné tambe ta hunga un ròl. Tratado Europeo di Derechonan Humano Apesar ku Kòrsou no ta forma parti di e Tratado en kuantu Refugiado, ta tumando vários pasonan pa dil ku e tema aki, sigur si tene kuenta ku tin personanan ta yega Kòrsou buskando un òf otro forma di asilo polítiko. Kòrsou ta afiliá sí na e Tratado Europeo di Derechonan Humano (Europees Verdrag voor de Rechten van de Mens -EVRM). Den artíkulo 3 di e último tratado aki, ta indiká ku esun ku yega un pais i di un forma òf otro no por bai bèk su pais natal debí ku e ta kore riesgo ku por tortur’é òf likid’é no por wòrdu deportá promé ku a hasi un estudio di e riesgonan ku e persona ta kore si e mand’é su pais bèk.
Maneho di gobièrnu Aparte di esaki, ya kaba Konseho di Minister a trata un proposishon di Ministerio di Hustisia pa bini ku un prosedura pa gobièrnu mes revisá e kasonan di posibel refugiadonan. Pues den kaso ku un persona en bèrdat mester di asilo polítiko por tres’é den kontakto ku UNHCR. Ora ku e maneho aki ku awor lo drenta na vigor lo permití ku Gobièrnu den e kaso aki via di Servisio di Atmishon lo por tin registro di e personanan akí riba nos pais. Mirando nos leinan aktual, un persona ku status di refugiado no ta risibí un pèrmit di estadia pero miéntras e ta en espera di ayudo di UNHCR, no por deport’é. Esaki basá riba artíkulo 3 di EVRM. Ta konosí ku personanan indokumentá sa purba di haña estadia dor di alegá di ta refugiado polítiko. Pa e motibu aki kada kaso ta wòrdu skrudiñá pa evitá asina ku un persona ku simplemente no ke wòrdu deportá, por hasi mal uso di e situashon eksistente.
Krus kòrá i UNHCR
Banda di e desaroyonan en kuantu maneho, for di 2010 Krus Kòrá ku ta kargando su seis mandamentunan di duna yudansa humanitario ta duna yudansa na famianan ku lo mester bini na remarke pa haña e status di asilo polítiko. Krus Kòrá ta intermediá ku UNHCR ku na su turno ta hasi e estudio pa saka afó si en bèrdat e persona òf famia ta bini na remarke pa aña asilo polítiko. UNHCR den e kaso ei ta regla pa e persona òf famia ku haña e status di refugiado por haña un pais kaminda e por biba ku su famia i kuminsá un bida nobo. Pues esaki ta enserá ku un persona ku haña e status aki serka UNHCR na dado momentu ta risibí refugio di un òf otro pais ku sí ta miembro di e tratado. UNHCR tambe a keda mashá kontentu ku e resultado di e bishita i ta satisfecho ku e esfuersonan di nos gobiernu pa ku e tema aki.
