Na memoria di un maestro di ceremonia, gran promotor, artista, presentador, amante di musica Caribense y amigo.

Ronny Manuela, alias ‘Baba Charly’, 24 september 1949 – 24 februari 2019

Baba Charlie MC Bonbini Festival

Ronald Albert ‘Ronny’ Manuela, miho conoci como ‘Baba Charly’ a nace na Aruba 24 september 1949 y bay laga nos riba diadomingo 24 februari 2019. Su mayornan ya a fayece.

Ronny alias ‘Baba Charly’ a cuminsa traha, despues di scol, na edad hoben den ramo di seguro. Ora el a haya un oportunidad, el a drenta prensa unda el a traha hopi aña na Radio Carina FM, Mega 88.1 FM y Galactica 99.9 FM. E tabata presenta su mesun show: ‘Baba Charly Calypso Show’. Su lemanan: “Nice man!”, “They like us!” y “Wash your hands!” a hacie hopi popular.

Baba Charly pa mas di 35 aña a deleita oyentenan na Radio cu su programanan di Calypso, y ta ser considera como e locutor cu a pega musica di Calypso na emisoranan. El a cuminsa esaki usando un bos (stem) cambia, na idioma Papiamento y Ingles. Asina a keda experimenta y yega na e imitacion di idioma Ingles di islanan Caribense, mescla cu Ingles di Trinidad, y a logra e formula cu nos conoce di ‘Baba Charly’.

Baba Charlie un senor y Juby Naar

Hopi hende semper a kere cu e ta un persona di Trinidad of di cualkier di e islanan Caribense, siendo cu e ta naci, cria, y creci na Aruba. El a pasa na Radio Carina, Radio Galactica y Mega 88.1 FM cu su programa y te recien ainda fanaticonan di Calypso tabata pidi pa e sali for di retiro y cuminsa atrobe cu su programa. Hunto cu Sr. Juby Naar, un gran amigo di dje, nan a transmiti varios ‘Festival di Calypso y Roadmarch’ hunto, ademas otro actividadnan cultural of musical riba nos isla.

El a fungi hopi aña como maestro di ceremonia pa ‘Aruba su Calypso y Roadmarch Contests’. E mes a yega di participa cu e cantica: “Hold on Aruba”, cu cual el a saca e premio di ‘Calypso Mas Popular’.

Ronald Manuela no tabata popular na Aruba so, sino na Corsou, Bonaire, Islanan Ariba, principalmente St. Maarten, Merca y Hulanda, como e figura di Radio, y farandula como MC.  

Den pasado el a trece varios show di artistanan grandi Aruba manera: Ray, Goodman and Brown, The Manhattans, The Drifters, Mighty Sparrow, Crazy, Lady Rose, Arrow, Bobo, Lino and the Hardwares, The Platters, y su deseo tabata pa ainda e por a logra trece The Cats y Lionel Richi. Baba Charly a trece y para maestro di ceremonia pa evenementonan grandi na Aruba manera e circo conoci ‘Cirque Soleil’, ‘Wrestlings’ y ‘Coney Islands’ varios biaha.

Ronny tabata un persona cu a stima nos cultura y arte en general. Y a para maestro di ceremonia hopi tempo pa shownan cultural, manera e Bonbini Festival …. Na Willem III Toren den Fort Zoutman. Di e 25 añanan cu a presenta ‘bonbini Festival’, sr. Juby Naar a presenta esaki mas o menos 10 aña cu ‘Baba Charly’ tambe. Asina nan a bira amigo grandi di otro, y Juby semper a bisa cu amigonan, manera ‘Baba Charly’ ta masha scars na mundo.  

Baba Charlie tabata un maestro di ceremonia popular pa hopi aña largo y riba nos isla el a dirigi shownan den tur distrito y na hotelnan. Ademas na varios hotel e tabata popular tambe como ‘Cantador di Bingo’, sigur den e manera chistoso cu e tabata canta su bingo.

Cu organisacion JUBA nan a organisa conciertonan di steelband cu participacion di varios steelband hunto riba un anochi. Y na San Nicolas tabata cu 11 steelband riba un anochi. Tambe a organisa varios anochi di concierto cu calypso, entre otro ‘anochi di musica di Sparrow’ y e ‘Socalicious’ cu nan a trece Aruba e cantante Slinger Francisco conoci como Rey di Calypso Mundial, Mighty Sparrow cu a actua gratuitamente den varios show riba nos isla. Durante e anochi aki hunto cu cantantenan di calypso, manera Mighty Whitey, Mighty Cliffy, Rudolph Gibbs, Mr. Culture Robert Maduro, Mighty Reds, Rafael Flanders entre otro.

Ronny tabata un persona cu curason grandi y ta laga tur cos para pa bay duna man na su amigo y conocirnan cu mester di un yudansa, sin importa e ora cu a tuma contacto cune. Semper por a conta riba dje, si el a duna su palabra pa haci algo pa otro y tabata cumpli cu esaki.

Mas o menos 5 aña pasa el a cuminsa haya problema di salud. Y den transcurso di añanan el a haya su mes na Colombia, na Corsou, y tambe na Aruba, na varios ocasion den hospital. El a biba cu su ‘ups and downs’ di e problema aki, te cu mas o menos 2 siman pasa el a bolbe drenta hospital y a keda bou di tratamento te cu su fayecimento diadomingo mainta. Diasabra mainta despues cu el a ricibi Santa Oleo, un di su amigonan a tene un discurso cortico den cual el a mustra riba esnan presente, net e personanan mas yega na Ronny. Esnan cu e tabata tin como amigo y ademas su famianan presente y a laga sa di ta contento di mira e 12 apostelnan hunto cu Baba Charly, manera un despedida di esnan cu mas a stim’e y cu mas el a stima.

Su ultimo trabou tabata pa bataya su malesa, pero diadomingo 24 di februari el a perde e bataya contra e malesa y el a bay cumpli cu su ultimo tarea di bay para maestro di ceremonia pa e angelnan y su Creador. Ayanan E lo haya su recompensa como un gran promotor, artista, presentador y amigo.

Departamento di Cultura Aruba, director, staf y personal ta manda nos palabranan di profundo condolencia na tur su famianan, amigo y conocirnan. Durante bida un persona hopi stima. Lo e haci hopi falta y Baba Charly su lemanan “Nice Man!”, “They like Us!” Y “Wash your Hands!” Lo keda den nos memoria. Aruba a bolbe perde un gran baluarte.

Cu Ronny alias ‘Baba Charly’ su alma sosega na paz den Reino di Señor.

Comments

comments