Despues di un prome edicion exitoso diaranson, 29 di Mei, Island Fest ta sigui den Main Street di San Nicolas, unda cu ta bay tin cumindanan crioyo y multicultural, y sin lubida e parti musical, cual ta priminti di ta algo espectacular.
E anochi ta cuminsa cu Sodo y Cuero, poniendo bon ambiente pa tur esnan presente. Massive Brass tambe ta bay cu sonidonan di Asambeo. Robin & The Rebels cu Jeremy Bonariba on drums lo sali for di nan High Rise Area y bin basha musica International den centro di e Festival. 
Aruba Summer Festival lo trece sorpresa durante e anochi di Island Festival hunto cu DJ Jeimy treciendo e toke di fin di siman. Buleria lo bin p’ariba pa cera e anochi espectacular na un forma unico. Bin disfruta y experencia nos estilo di bida local, durante Island Fest, awe nochi, for di 7 PM pa 10:30 PM di anochi den Main Street, San Nicolas, caminda lo bay tin cuminda crioyo, cumindanan multicultural, shownan historico espectacular y naturalmente sin laga afo, bandanan en bibo. Ruben “Scorpio” Garcia y Maicky “Campo” Oliva lo percura pa anima e show durante e evento familiar aki.
Entrada ta gratis. Asina ta, bin pasa un rato ameno y contento na San Nicolas durante e Island Fest, cuminsando awe, dia 26 di Juni y tur ultimo siman di cada luna. Bin disfruta di nos estilo di bida local na San Nicolas, caminda Aruba ta bin hunto. Asina ta “Come and experience our local way of life in San Nicolas City. Aruba meets in San Nicolas.”
