Awe tardi Minister mr. Andin Bikker a reuni cu Secretario di Estado di Hulanda, Raymond Knops, den cuadro di su bishita na Aruba. E reunion a bay den bon ambiente y tabata masha fructifero, caminda Minister Bikker a gradici p’e sosten di Hulanda pa por a institui e Academia di Ley pa medio di e Aruba Desk di e Centre of Legislation, a base di cual awor tin en total como 20 hurista di Aruba cu ta sigui un curso amplio pa gradua como hurista legislativo.
Den filosofia di Minister Andin Bikker, por compara leynan cu ‘software’ di un pais y pesey ta importante pa amplia e capacidad di specialistanan cu por yuda traha conceptonan di ley, pa asina por actualisa nos leynan mas pronto posibel. Cu como 20 hurista legislativo adicional cu lo gradua e aña aki, lo aumenta e capacidad di traha conceptonan di ley.
Tambe Minister Bikker a splica cu Gabinete Wever-Croes desde presupuestonan di 2018 bay ariba, conhuntamente cu Parlamento di Aruba, a bin ta duna prioridad na aloca fondonan presupuestario pa entre otro Husticia, pues cu esey e condicion ‘H.1’ pa no tin recorte riba presupuesto di Husticia ta algo cu ya caba tabata wordo ehecuta den e maneho di Gabinete Wever-Croes.
Por lo demas a intercambia pensamento riba e retonan di Covid19 y Minister Andin Bikker a duna e mandatario Hulandes un update di proyectonan andando pa reenforsa vigilancia na frontera, manera e exitoso sistema di radar den combinacion cu vigilancia aereo, y otro avansenan cu ta implementando, manera e intencion pa traha un edificio nobo pa unidadnan di Cuerpo Policial di Aruba y Migracion Aruba na Barcadera y introduci mas camaranan sofistica (“FLIR: Forward Looking Infrared”).
