Tradishonnan di fin di aña a drenta kaminda nos pueblo ta hasi diferente invershon pa ku e selebrashonnan ku tin di aber ku temporada di fin i kambio di aña.
Maske retonan ekonómiko ta grandi reflehando bèk riba diferente area, tòg nos komunidat ta buska e manera pa sigui disfrutá di un di e temporadanan di mas dushi di aña segun kada ken su forsa. Un temporada di harmonia kaminda hende ta sali mas, hasi otro bishita i trata na pasa un ratu kontentu i ameno den kompania di otronan.
Den e temporada aki nos sentro di siudat o sea Punda i Otrobanda ta un de areanan ku mas ta keda bishitá pa su tradishonal anochinan di kompra, plenchi i kayanan dòrná ku lus ta hopi gustá huntu ku e diferente ofertanan ku diferente negoshi ta ofresé. Ku otro palabra tin hopi hende tantu lokal komo turistanan ta trafiká na pia hasiendo uso di tur e posibilidatnan ku nos sentro di siudat ta ofresé.
Un di aspektonan ku nos ke para ketu na dje ta e echo ku banda ku tin mas tantu hende ku usual ta trafiká den nos sentro di siudat tambe tin mas tantu vehíkulo den i rònt di nos sentro di siudat. Teniendo na kuenta ku loke minister a deklará na diferente okashon den diferente medionan di komunikashon ku e asina yama Bike Team lo ta aktivo ora esaki ta nesesario. Mirando e intensidat ku e aktividatnan ekonómiko ku e temporada aki ta trese kuné huntu ku e trankilidat ku presensia di kuerpo polisial tin tantu pa e bishitantenan komo e negoshantenan i tambe e echo ku presensia polisial ta stroba antisosialnan di kometé fechorianan, nos ta kere ku e asina yama Bike Team mester keda aktivá mirando e balor agregá importante pa eksito di e temporada aki den sentro di nos siudat.
Konforme artikulo 96 di Reglamentu di orden di Parlamento suskrito ta hasi uso e oportunidat aki pa hasi minister algun pregunta regardando e puntonan ariba menshoná.
- Minister por informá Parlamento di e situashon aktual di e asina yama Bike Team?
- Kuantu miembro e BikeTeam aki ta konta kuné?
- Tin intenshon pa re-aktiva e Bike Team durante e luna di desèmber mirando ku tin mas aktividat den sentro di siudat manera ya menshoná?
- Si hasi uso di e Bike Team lo amplia e kantidat di miembro pa e temporada aki?
- Lo hasi uso di miembronan di kuerpo polisial ku ta trafika riba quad tambe?
- Den e maneho aki lo inkorporá areanan pafó di siudat tambe?
- Si no hasi uso di Bike Team tin otro opshonnan riba mesa pa garantisá trankilidat i visibilidat di kuerponan di seguridat den sentro di siudat?
- Minister por indiká na Parlamento si tin intenshon pa sea reforsá of amplia presensia di kuerpo polisial ku eventual kuerponan di seguridat durante e temporada aki den otro areanan di Kòrsou?
- Minister ta di akuerdo pa hasi un yamada na tur empresario pa nan tambe insentivá nan kuerpo di vigilansia porta den koperashon ku KPC?
Mirando e retonan sosial i ekonómiko ku nos pais ta konfrontando nos ta di opinion ku e temporada aki ta unu ku por trese kontinuidat pa diferente negoshi i mantené kuponan di trabou vigente basta esakinan saka lo máksimo for di e temporada aki. P’esei nos ta kere firmemente ku partisipashon i presensia di kuerpo polisial i eventual otro kuerponan di seguridat uniformá ta un piesa indispensabel pa logra esaki.