E candidato presidencial democrato Joe Biden den fin di siman tabata na North Carolina cu e meta pa haya voto for di residentenan Afro-Americano y a exigi cero tolerancia cu supremacista blanco. Di otro banda su rival, presidente di Merca, Donald Trump a busca pa convence Latinonan durante su bishitan na Nevada.
“Nos no mester tin ningun tolerancia na supremacista blanco cu ta marcha pa nos comunidadnan, pero si bo ta bisa ‘no tin necesdidad di confronta inhusticia racial di e pais aki,’ manera Trump ta bisa, bo no a habri wowonan di berdad,” Biden a bisa. Ex Presidente Barack Obama a gana e estado di North Carolina na 2008, cual tabata un victoria p’e democratanan. Pa Trump ta fundamental gana e estado aki.
Di otro banda Trump a bishita un misa na Las Vegas, unda el a sinta den misa sin mondkapje manera otronan y no a mantene distancia social. Den Carson City el a dirigi su mes na Latinonan pa casi dos ora. El a bisa di gusta Latinonan, pasoba nan ta doño di negoshinan chikito y no por imagina con bon nan ta como negociante. El a probecha un biaha mas pa lastra Biden.
Den North Carolina Biden tin e bentaha riba Trump pa un margen di 2.7 punto segun e sondeo di media RealClearPolitics Na Nevada Biden tin un adelanto di 5.2 punto riba Trump, segun e promedio di sondeo.
