Biblioteca Nacional Aruba ta presenta su evento anual, Festival di Buki pa Mucha, e dianan 8 pa 12 di november benidero. Den cuadro di e preparacionan biblioteca ta ofrece un workshop na e maestronan di scolnan primario, basico y special. E meta di e workshop ta pa duna guia y idea na e maestro con pa stimula mucha pa lesa mas y lesa hunto den klas pa medio di un presentacion online. Esaki ta accesibel for di dia 27 di september 2021 riba biblioteca su website y YouTube channel. (www.bibliotecanacional.aw)
E facilitadornan pa e tayer ta Mirto Laclé, Richard Dabian y Rosy Abreu. Tambe e tayer ta ofrece inspiracion na maestro/a con pa incorpora e tema den contamento di storia y otro expresion creativo pa cu e tema. E docentenan cu ta registra ta haya mas informacion via email.
Biblioteca Nacional Aruba ta ofrece mas informacion tocante e festival pa medio di su website. Pa pregunta riba e organisacion por email sra. Yosmar Maduro-Sneek, [email protected] of yama tel. # 528 1539.
