Aruba Tivoli Club ta conoci como un di e pioneronan pa loke ta Carnaval di Aruba. Segun Bibi Arends, ex presidente di Aruba Tivoli Club. Nan a cuminsa hopi tempran den añanan 40 den e edificio bieu y despues e edificio nobo cu a wordo traha na 1944.
Despues di guera mundial, Tivoli a subi caya. Despues mas grupo a join, Viceroy, Caribe, Watapana y Carnaval a cuminsa crece. Cierto momento sr. Tushi Arends, kende tabata presidente di Tivoli e tempo ey, a invita tur e carnavalistanan, tambe na San Nicolas, Chinese Club, Plymouth, varios otro club di San Nicolas, cu tabata haci Carnaval un tiki paden, pa yega na un acuerdo y a logr’e tambe, pa organisa un solo Carnaval.
E tempo ey a firma un acuerdo y esaki tabata yama CCC (Centraal Carnaval Commitee) y pa inaugur’e, na januari 1954, cu carnaval a cuminsa, a eligi e prome reina di CCC den Lago Sportpark e tempo ey.
E reina cu a sali tabata Evelyn Croes, kende tabata reina di Tivoli. Esey tabata e inicio di e carnaval.
Cu e añanan, poco poco e gruponan a cuminsa bay p’ariba y bin p’abao y el a bira grandi. Despues el a bira SAC, etc. Tivoli a tuma masha hopi iniciativa na cuminsamento di Carnaval. Tivoli a bin cu Ballonnen optocht. El a bin cu fakkeloptocht. E tabata un parada chikito, como e prome fiesta di carnaval di e temporada cual nan ta eligi e figuranan di carnaval.
Di Tivoli cu tabata tin reina grandi, Joker cu tabata un hende cu tabata anima e carnaval. Joyita, cu tabata e Reina Infantil, etc. Pa haci e prome fiesta y cuminsa cayente, nan a haci un fakkeloptocht chikito den caya, masha cortico. E fiesta ta cuminsa cu mas briyo. Durante e eleccion eynan tambe, tabata paga pa “voto”. E ta un coy loco di 10 cen, cuatro placa.
Pero finalmente e resultadonan ta bay den votonan cu un total di 500 pa 600 florin, cual ta basta placa pa e tempo ey. E reina cu sali lo a haya 90% bek pa e por bay eleccion den stadion. Asina caro cos tabata e tempo ey. E resto di placa Tivoli tabata uz’e pa e por sigui celebra e temporada di carnaval.
Despues Tivoli a bay durante añanan 60, 70 den su gloria di carnaval. Por ehempel durante añanan 70, Tivoli a sali 10 aña consecutivo grupo di carnaval, durante parada grandi grupo di aña. Pero tabata tin hopi otro cos a tuma luga. Na 1981, Tivoli a pidi SAC permiso pa bin cu algo nobo. A copia un parada di luz di Disney World y kier a introduci’e na Aruba. Na dicho aña, debi cu Tivoli a celebra 60 aña, pasobra el a wordo funda na 1921, a introduci Lighting Parade.
E tabata un exito total y rotundo. Eynan Lighting Parade tambe a cuminsa crece. Fakkeloptocht tambe a cuminsa crece. Lighting Parade a bay den su gloria y Fakkel tambe. Na final di 1980 te na final di 90. Na final di 90, e gruponan grandi di Tivoli cu tabata forma e paradanan di Tivoli, a cuminsa introduci publico den nan paradanan. E ora esey a haci e paradanan mas grandi na fin di siglo y e calidad a baha un poco.
El a pick up basta bon despues te cu awo. Segun Arends, e Lighting Parade tabata algo masha exitoso. A cuminsa cu poco luz, cu frame, etc. Despues a introduci e chaser, cu ta cambia e luz na sequence, caminda cu por haci un movecion di luz. Despues a bin cu huma y poco poco e cos a bira enormemente grandi.
Un di e paradanan di Lighting Parade di mas grandi ta tempo cu el a bira asina grandi cu a dicidi di sali for di den Paardenbaaistraat, p’abao di DOW bieu na waf caminda ta lign up y ta bira bay ariba. Ora cu e cabes di e parada a yega na Talk of the Town, e rabo tabata sali.
Lighting Parade tabata tin e tempo ey 28 roadpiece, 9 carosa, y e Lighting Parade tabata masha grandi mes.
Un otro hopi grandi ta cu tempo cu La Reina y su famia a bishita Aruba. Nan mes a para dilanti di Talk of the Town y a bin for di Vondellaan. E tabata un tremendo Lighting Parade. Un di e gruponan den e Lighting Parade a bin casualmente na Hulanda cu escudo di Hulanda, cu bandera di Hulanda. Tambe e bandera, keshinan cu nan tabata bende. Tabata un impresion enorme pa La Reina. Un pa un nan tabata pasa su dilanti y tabata homenahi’e cu nan presentacion di e parti di Hulanda.
Esey ta Lighting Parade den su temponan grandi. Arends a keda dirigi’e. Desde di hoben e tabata yuda Lorenzo Arends y Janchi Arends, dirigi e paradanan. Semper e atencion tabata riba e paradanan y semper hopi coordinador. Te na ultimo Bibi Arends tabata tin 12 hende ta yud’e tur cu radio. Practicamente e esencia tabata bay cu e parada mester move steady. Un parada para ta mahos y un parada cu ta core ta mahos. Un parada cu gap ta mas mahos ainda.
Cada grupo practicamente tabata tin un coordinador banda di dje. Kico cu pasa den e grupo cu por haci cu pa habri un gap, ta avisa Arends, e ora ta slowdown e cabes pa e por keda cera. Esey tabata e meta di mas grandi pa e parada drenta pasa cera bunita, yen di musica y luz, no ta di papia mes. Enormemente hopi luz tabata tin. For di hopi leu ta puro luz bo ta weita den e Lighting Paradenan cu tabata organisa.
Habrimento di siglo, cos a cay un tiki. Segun Arends, e tabata sinti den e hendenan general, hendenan mas excita, mas agresivo cu no ta scucha loke cu ta bisa y rond di 2009, Arends a baha cu pensioen y rond di 2010/2011, Arends a pasa Lighting Parade y Fakkel over pa SAC. E tempo ey caba SAC tabata pasando pa SMAC. Eynan ta caminda cu Arends a lag’e bay y sigui’e.
Arends tabata wordo invita casi tur aña na diferente trailer pa wak e paradanan. Nunca e tabata para na banda. Ultimo añanan e no ta bay mes mas, pasobra ya ta hopi desapunto di loke e por mira aworaki cu loke tabata haci den pasado. Aunke cada cos tin su tempo.
Arends por mira riba television y ta puntra su mes pakico. Pakico e parada ta habri asina grandi cu un TeleAruba ta bay comercial. Despues e ta pega, e ta para 20 minuut un caminda. Atrobe ta puntra pakico. Ta mira cos, bailamento berdad, pero ni un coordinador, leu leu un polis ta cana pasa pero su tarea no ta pa coordina e parada.
No tabata tin ni coordinacion den e parada ni pa papia mes di e calidad di e parada. Parada na cuminsamento di e siglo nobo a cuminsa laga bay. Roadpiece, carosa, e cosnan ey a bira mucho caro. Casi impagabel. El a bay mas den masa.
Pa algun tempo algun masa tabata bunita tambe. Fakkel tambe a perde tur su caracter di Fakkel. Bo ta wak tur cos menos fakkel. Tin biaha hasta Lighting Parade bo ta kere cierto momento ta fakkel bo ta weita. Asina e cosnan a bay atras. Esaki ta duel Arends hopi.
E no ta un hende cu ta para critica cualkier detaye, pero e ta sigui’e si y ta bisa kico e ta pensa. Hopi hende ta pensa pa cambia nomber, etc. cu otro aña parada di mucha ta bira anochi. Con por haci cos asina. Ey ta mira cu no tin experiencia den e cambionan cu nan ta haci. No sa ta ken ta conseha cambionan asina.
Arends a menciona cu e ultimo añanan cu a pasa, p’e e carnaval y paradanan den districto, manera na Noord, Santa Cruz, ta cuminsa parce e paradanan tempo cu Tivoli a cuminsa. Hopi bunita. Hopi colorido Hopi coordinacion. Hopi ayudo y nada caro den musica, manera tin cu paga awendia.
Por mira esey principalmente pasobra e ta den hubentud. E ta wak toch un speransa cu carnaval lo bolbe transforma den futuro cu e hendenan ta weita mas riba e generacion cu ta lantando. Dushi pa tende awendia loke prome no tabata asina, cu durante cuminsamento di carnaval te na final tin fiesta di carnaval na e scolnan, den Centronan di Bario. E cos ey ta bon, segun Arends. Esey ta e carnaval di Aruba.
Loke ta presenta den caya grandi ta e culminacion. Si bo presenta esun den districtonan, den barionan, bira bon, automaticamente e grandi ta bay bira bon den futuro. Pa Arends e paradanan grandi ta mucho monopolio, mucho placa, hopi negoshi, hopi preferencia cu ta pasa riba cabes di carnavalistanan y esey ta jammer. Pa Arends, un stichting sea SAC, SMAC of ken cu ta, mester ta e sindicato di e carnavalista. E no mester deal cu banda, cu organisacionnan cu ta riba carnaval. E mester faborece e deseonan di e carnavalista y esey Arends ta bisa, ta sigui ta laga hopi di desea ultimamente.
Con tabata haci’e antes
Arends ta bisa cu awendia pa bin cu un carosa ta impagabel. Antes e no tabata por nada tampoco. Pero e diferencia di carnaval den e tempo aya, e carnaval tabata mas social. Hendenan tabata bin hunto na cas, nan ta yuda otro traha roadpiece. Welderdonan ta bin yuda, nan ta trece cerbes, otro hende ta trece bolo, cuminda. Basicamente esey tabata e parti di mas dushi di carnaval di antes.
Bin hunto y na un manera social. Realmente coopera cu otro y produci cosnan hopi creativo. Hopi biaha ora hende ta papia di carnaval di prome, nan ta papia mas di e dushi dianan prome cu e carnaval. E carnaval mes ta un rato ta pasa. Pero ta corda e tempo ey cu ta echt esey ta e carnaval di Aruba. Den e hendenan, den e pueblo, den e scolnan, den e cas di anciano di awendia. Esey ta carnaval di Aruba.
Esey tin cu bin rescata e paradanan. Lighting Parade, no uza e nomber ey. Pa loke ta produciendo no por uza Lighting Parade awendia mas. Mayoria di e paradanan tambe manera fakkel, no tin fakkel mes. Cambia e nomber. Si bo ta bay den un otro dimension, dun’e nomber cu e merece cu bo por reconoce.
Parada manera Sunset Parade di Noord, mira con e ta creciendo, bunita. Pakico? Pasobra e ta den man di hendenan cu ta stima carnaval, cu ta bin hunto, ta organisa. E no ta tira riba computer pa bo kies un disfraz, pa bo paga bo haya un banchi y si bo bay bo so, bo no sa ni cu ken bo ta balia. Esey ta e carnaval moderno di awendia cu ta hopi comercial, hopi monopolio. Esey no ta bon pa Aruba, segun Arends.
