Ta tristo ora bo mira cu na Aruba no tin husticia. Esunnan cu ta haci maldad ta esnan cu ta cana liber. Esunnan cu ta un molester pa comunidad y molester pa comerciantenan, ta esnan cu ta cana liber y sigui horta. E pareha aki diasabra dia 23 di october a drenta un supermercado chines pa horta.
A yama polis cu a yega y despues di analisa e evidencianan a sali busca e dos ladronnan. Ta un pareha ladron cu strategicamente ta drenta negoshinan pa horta. Diasabra a detene ambos despues di drenta horta den supermercado chines banda di postkantoor pabou di misa na Playa.
Polis a mira e imagennan di siguridad y a bay busca drechi di e pareha ladron. A topa cu nan tambe y ambos a bay warda. Subfiscal a atende cu nan tambe. Parce nan detencion tabata cortico. Ambos a sali liber mesun diasabra. Diadomingo ta otro dia pa sigui horta. Kiermen manera un bon ladron prepara ambos a sali caya y a bay Citgo Blvd.
A drenta cu rugtas y strategicamente a prepara pa sigui horta. Cosnan di prome necesidad no tabata un prioridad. Pesey a coy cosnan pa paranda y fiesta di ladron riba caya. A coy boter di biña y pone na un mesa pa asina busca e chens pa hinc’e den e rugtas di e ladron femenino.
Mescos a sosode despues tambe cu otro productonan den Citgo Blvd. E bon ta cu tur cos a keda graba. P’esey ta importante pa nos ilustra pa e pueblo e cara di e ladronnan y con nan ta drenta horta den bo negoshi.