Bergen ta “out” y Guedez ta “in” den Parlamento

Manera cu 24ora.com a informa ayera den forma di primicia, awe mainta Luigi Bergen a anuncia su retiro “temporal” for di Fraccion di MEP den Parlamento. Un rato despues e partido a informa den un comunicado cu di siman pasa Bergen a laga partido sa di su decision. Motibo ta cu Luigi Bergen ta un sospechoso di violencia domestico. Aunke partido a haci un apelacion riba Sue-Ann Ras pa e regresa, toch na final a dicidi pa Darlaine Guedez-Erasmus asumi e funcion di Parlamentario.

Luigi Bergen awe mainta, despues di a nenga pa simannan largo cu e no ta un sospechoso, a bay den noticia na e emisora di Minister Otmar Oduber, esta Power FM, nenga rotundamente cu e ta un sospechoso, toch awe el a admiti lo contario. El a acusa su ex casa di adulterio y cu ta pesey el a bay lag’e. Segun Bergen, mientras cu e caso ta andando e lo keda for di Parlamento y despues cu e prueba su inocencia, e lo drenta bek den Parlamento. Henter partido MEP ta di opinion cu ora un Parlamentario bira sospechoso, e no por keda den Parlamento.

MEP ta para pa integridad

Cu esaki Luigi Bergen y partido MEP ta demostra kico ta realmente integridad den politica. Dia cu Luigi Bergen a bira Parlamentario, e no tawata sospechoso y hasta a presenta un declaracion di Ministerio Publico. Lamentablemente Bergen si tabata bon na altura cu tin un caso penal contra dje, pero no tabata sincero cu su coleganan y a opta pa presenta un prueba di bon conducta, cu tur hende ta haya tanten cu no tin un condena contra nan. Sinembargo Siguridad Nacional si lo tabata bon consciente cu e politico ta pasando den probelma matrimonial serio y cu ta bay man den man cu violencia.

Darlaine Guedez ta asumi funcion di Parlamentario

Darlaine Guedez-Erasmus lo reemplasa Luigi Bergen den Parlamento. Darlaine tabata number 17 riba e lista di MEP den eleccion di September 2017 y a logra no menos cu 525 voto. Darlaine ta casa y ta mama di dos yiu. El a lanta den districto di Paradera y tabata activo den varios acrividad social den bario. E tin un diploma di HBO den Sociaal Pedagogische Hulpverlening y a traha cu adictonan, problemanan social, problemanan den famia y ultimo dos aña a traha cu Minister Glenbert Croes riba tereno social. Awor Darlaine Guedez lo por aplica su conocemento, experiencia y vision den e organo constitucional mas halto di Aruba.

Di tres retiro den Fraccion di MEP

Cu salida di Luigi Bergen for di Parlamento, e fraccion di MEP ta tuma despedida di su di tres miembro. E prome tabata Sue-Ann Ras, cu a hay’e ta tuma retiro despues cu un periodista Hulandes a gar’e ta mira pelicula via Netflix durante un pleno reunion di Eerste Kamer na Den Haag, Hulanda. E di dos retiro a bini ora Daphne Lejuez a opta pa bandona fraccion pero a bira independiente, pues a keda cu su asiento pero no ta forma parti mas di e di dos partido mas grandi di Aruba. Pero, no obstante noticianan cu nos a publica rond di Luigi Bergen prome cu el a asumi su funcion y problemanan cu e tabatin den Ministerio mes, toch directiva di MEP a opta pa deliberadamente core e risico di nombr’e toch y despues di apenas dos luna, awor ta hay’e ta tuma retiro.

Overbruggingstoelage

E salimento for di Parlamento ta habri espacio pa e politico cobra loke nan ta yama un “overbruggingstoelage”, cu ta un aña di salario completo of mayoria parti di e salario. Ta un “bonus” di riba 100 mil florin cu e ex Parlamentario ta haya, sea como un “lumpsum” of mensualmente. Den caso di Daphne Lejuez, e no ta aplicabel pasobra el a keda den Parlamento. Pero Sue-Ann Ras y Luigi Bergen si ta bini na remarca pa esaki.