Benu tabata tey na sede di Mary Joan Foundation pa duna un man. Nan a contribui cu ArubaDoet y ta pa di shete aña cu nan ta participa y ta hopi orguyoso pa contribui na Mary Joan Foundation. Ryan Rogers di Benu, a splica cu e proyecto basicamente ta pa crea un arte cu mosaico.
A corta tegels, formando den e caso aki barbulet. Simbolicamente barbulet ta ilustra libertad. Mescos cu e barbulet ta bula liber, e clientenan mester sinti nan liber. Na final di e proyecto cada un di e barbuletnan ta bin hunto y ta forma un solo cuadro grandi.
Rogers ta un ciudadano corporativo y ta sostene tipo di actividadnan asina. Tur hende mester por dedica dos pa tres ora di nan tempo pa hinca den proyectonan asina, proyectonan boluntario pa trece tambe e concientisacion cu nos tin cu ta mas humano. Mester por yuda otro y crea actividadnan pa e miembronan por sinti parti di e comunidad y por sinti nan mes parti di e proyectonan asina. Mester por traha dos tres ora pa por haci esey.
Mary Joan Foundation
Arabella Reyes Colina, presidente di Mary Joan Foundation, a splica cu e iniciativa di diasabra tabata pa traha un obra cu esey lo bay wordo poni pa nan tambe despues. E ta e sentimento y expresion di e clientenan, kico pa nan ta sobrevivi e parti di cancer. E ta un bunita obra cu a pone pa haci, hunto cu e boluntarionan di Benu y esey ta algo cu ta aprecia masha hopi mes, pasobra e acogida tabata tremendo. Nan a bin cu 10 boluntario pa bin yuda na Mary Joan Foundation. Aruba Doet ta haciendo un tremendo trabao. Ta nan di 3 aña cu Mary Joan ta cu nan. Nan ta hopi satisfecho cu loke nan ta organisa hunto cu nan.
Benu
Segun Reyes-Colina, Benu a acerca e fundacion pa nan ta e grupo di boluntario pa bin yuda. Fuera di ta boluntario, semper por conta riba nan sosten pa tur otro evento cu nan tin. E fundacion ta hopi contento di esey tambe.
Mas plan
Mary Joan Foundation tin algun plan, pero no por a bay den mucho detaye. Sigur den e parti di concientisacion ta druk bezig cu esey. Tambe nan tin e proyecto di peluca cu ta bayendo. Mester di mas boluntario cu echt tin gana di haci e parti eynan. E ta bayendo hopi bon, segun Reyes-Colina. Pa e aña aki tin algun cambio mas cu ta bay bin. Pero pa esey tin cu keda pendiente, el a finalisa.
