E unico manera cu por wak e situacion penoso financiero cu Serlimar ta pasando aden ta un abuso total di poder caminda a abusa pa privilegia su mes y su amigonan. NADA otro!!
Parlamentario Benny Sevinger ta conta cu Serlimar tabata un organisacion, un departamento, un siugeneris di Gobierno cu tin un responsabilidad grandi di recoge sushi y mantene nos pais limpi. For di 2006 cu Candelario “Booshi” Wever a haci’e siugeneris, nunca nan tabata tin un budget cu ta cera. For di gobierno nan tabata ricibi 12 miyon y hunto cu nan trabou priva cu nan tabata haci, nan tabata cera nan budget.
Na momento cu partido AVP a drenta den gobierno e budget a keda igual, 12 miyon, dado momento el a cambia y bira 16 miyon pa nan por a cumpli cu nan gastonan y e extra cu nan ta haci cu e trabounan priva.
Sevinger ta remarca cu ora Otmar Oduber a drenta den gobierno, el a bay bisa Parlamento cu e 16 miyon no ta suficiente/ no ta yega y cu e kier 8 miyon mas. Parlamento di su banda a cuestiona e peticion aki, pero a haya como contesta cu e lo ta pa cubri tur gasto di Serlimar, ricibiendo e ora ey casi 24 miyon pa tur gasto di Serlimar.
Cu esaki tambe a nifica cu tur locual cu Serlimar tabata cobra pueblo y traha extra den sector priva lo tabata pa inverti den e luga, pasobra Gobierno lo a cubri tur gasto caba cu e placa extra cu Oduber a pidi extra den Parlamento. Aki ta papiando di aña 2018 net comienso di Gobernacion.
Insolito ta locual cu a pasa na 2019 na momento cu ta bin bek den Parlamento y bisa cu e 24 miyon cu el a haya e aña anterior no tabata suficiente. Den e prome luna di 2019 el a gasta casi 18 miyon cu por tabata e motibo cu e 24 miyon lo no a yega pa cubri ningun gasto mas.
Kico ta locual cu Otmar Oduber a haci?
El a bay huur un edificio di un sponsor di dje. Mientras cu na prome instante a cuestiona esaki. Na 2018 a puntr’e si acaso Serlimar lo bay muda y aki ta caminda el a sigura cu no ta asina, cu e no ta un prioridad y no tin placa pa tal hecho. Contratiempo cu DTI a pone cu e plan a cambia, door cu no a logra saca DTI y mande bek edificio na Pos Chikito ( cu ta di su Sponsor ) el a dicidi obligatoriamente cu Serlimar ta bay huur e edificio pa un supuesto Dump di reciclahe.
Pueblo ta testigo, segun Sevinger, cu te dia di awe, nada ta sosode den e luga ey. Trucknan para eyden pornada haciendo nada y pueblo ta paga casi 1 miyon extra pa e abuso aki.
A kibra contract cu Johnson pa bin cu incinerator nobo!
Segun Parlamentario Benny Sevinger esaki tampoco no ta funciona. No a traha niun dia y no tin placa pa pone funciona tampoco. Algo cu DOW tabata paga, a sak’e for di eynan pa no tin pakico duna cuenta na Parlamento y mande bou Serlimar cu a costa un otro 3 pa 4 miyon extra. Na mes momento a dicidi di cumpra trucknan nobo cu a costa miyones mientras e trucknan cu ta di gobernacion anterior por a bay un cinco aña mas. Pero tur ta para awo, wardando benta y ta daña birando hero bieu. Algo absurdo y innecesario. .
A bay pone sticker “Branding” pa mercadeo riba tur truck
Esaki tambe a bira algo pa via via e tambe beneficia di dje. A bay traha sticker pa bentana di edificio, pa pone riba tur truck na “Branding” cu a costa miles y miles di florin. Mirando cu esaki no tabata suficiente a bay busca artistanan local pa uza como propaganda riba truck di Serlimar y pa haci propaganda pa Serlimar como un gasto adicional pa luna riba payrol di Serlimar. Cada un di nan, gastonan innecesario cu Otmar como Minister e tempo ey a obliga e hunta di comisario, consecuentemente e director pa haci mientras e mes a bay cas.
El a strica su placa. Su companianan di pega sticker a strica placa, su sposornan a strica placa y awor Serlimar su cuenta cu su problema. Anto esun cu a bin na su luga tin cu bay ruim op de boel. Un abuso cu tin Serlimar den un estado financiero penoso.
