Benny Sevinger di AVP a splica con Minister Otmar Oduber ta prepara su fondonan pa por Manipula cune. A menciona cu ANSA, a wordo privatisa. Den ministerraad el a bisa cu si privatis’e, nan mes por haya nan placa, nan mes ta nombra nan hendenan. Ta un smokescreen cu mes a pone.
E placa aki ta placa cu tabata bay den caha di gobierno pa loke ta minister di finansas. A kita esaki, hink’e eynan. E ta dicidi ken ta tuma Fire/Hire, ken ta haya aumento, ken ta bira director, etc. Esey ta e forma con e minister aki ta goberna. Despues di esey a bin un fundacion di Museo. Tambe coy 10 dollar for di turista, nada ta bay pa caha di gobierno. E ta dicidi tal museo ta haya tal placa, tal hende ta haya tal cos, asina ey e parti di 10 dollar ey, pa e tin un otro pochi, unda e por hiba e politiek cu e gusta di nombra hende, fire/hire, duna contract bao di man, riba mesa, bao di mesa, duna hende loke e ta kere por cumbini’e politicamente y por ta personalmente tambe.
TPF, mesun cos. Tambe a bin den ministerraad y a bisa cu hotelnan kier pone un placa, pero no kier pone den finansas, sino unda cu e minister di turismo, hunto cu otronan ta dicidi con ta bay drecha parti di nos pais, pa e producto di Aruba. Mesun cos, segun Sevinger. Lanta un fondo, pone miyones den dje. E ta sinta dicidi eynan. E ta heer en meester, wheel and deal. Asina TPF a wordo lanta.
Directie Scheepvaart, mesun cos. El a bin pa regla esaki pa haci’e priva, pa asina ey a bin cu un belasting cu yama liggeld, pa e barconan cu ta para eyfo, haci transaccion, paga no na caha di gobierno, sino un scheepvaart privatisa, unda e minister ta dicidi ken ta haya contract, ken no, y ken ta wordo tuma.
ATA Bank. Esun di mas cla. Esun di mas grandi. 100 miyon tabata bey eyden. Aruba, mester di placa pa scol, pa careteranan kibra, pa husticia, nada di esey. Placa ta bay direct pa ATA y ta contento, pasobra por tambe por vota voor pa esey, pa e placa bay ATA pa e por promove y haya mas turisto. Pero tin un limite. E no por ta cu cada biaha cu tin un aumento na hotel, pasobra REVPAR a subi, mas placa ta drenta ATA y nada no ta bin bek pa gobierno. 100 miyon ta bay por lo menos pa ATA y e minister ta wheel and deal. E ta cera contract cua conciertonan, ken no, firma tur loke ta riba 10 mil florin. Firmamento ta bay di e minister, tur cos mester pasa via dje.
Aruparking, mesun cos. Aruparking a wordo lanta pa un problema di caya, ta mira un oportunidad di bin cu un cos nobo. Pa nombra hende den dje, pa pone esaki y pueblo ta esun cu tin cu paga, minister ta wheel and deal den esaki. No ta nada otro di loke e kier haci awor cu Serlimar.
Ban busca e placa, 22 miyon, a hay’e di Parlamento caba, binnen. Nan paga tur gasto di Serlimar. Sigura cu tur trahado haya un entrada. Pero no por nombra hende, no por duna un canti caminda extra, con e ta bay haya e placa ey. Ban pasa un cuenta nobo pa nos comunidad.
Esey ta e esencia di e discusion cu ta aden na e momentonan aki. Un minister cu kier pochi di placa tur caminda. Sevinger a bisa den parlamento, cu ainda tin mas ta bin. Marine Park tin cu bin ainda. Tur e hendenan cu ta scuba dive, tur e hendenan cu ta deal cu turista, mester bay paga un fundacion pasobra nan tin cu bay dive wak coral. Awo caba ta wak coral, ta parti di e bendemento di producto Aruba, na e turista. Nan ta bin, nan ta dive, ta paga hende cu ta biba di e negoshi aki, pero awor aki no. Nan mester bay paga e fundacion cu e minister aki ta bay lanta, pa cada hende cu dive, tin cu bay paga un fee, pasobra cu e ta esun cu tin cu bay nombra lifeguard, e tin cu bay busca boto, di ken e ta bay busca e botonan, ken ta bay core e botonan pa controla, bao di e morto di Marine Park, ta bay haya un pochi di placa pa e por wheel and deal.
Esey tin cu bin ainda, segun Sevinger. Esaki lo bay sosode.
Otro cu ta bay bin ainda, ta e 16 areanan cu ta wordo proteha pa nos naturalesa. B’a kere cu por nada el a kita e director y henter e directiva di parke? Pa e bin cu su mesun hendenan, cu si bo kier bay cana den e duinen of kier bay bishita un di e luganan aki, tin cu paga. Esey ta bay den un comision, den un fondo, unda cu e minister ta bay dicidi ken ta bay haya, ken no ta haya, con ta kita, ken no ta kita. Esey ta di dos cu tin cu bin.
Di tres cu tin cu bin. Shete promil, riba commercieel terein. El a bisa den parlamento. Sevinger a adverti MEP riba esaki. Ta bay bin un fondo unda cu un hende haya tereno comercial, tin cu pone den e fondo aki 7.5 promil di loke e inversion ta. Esey ta nifica cu si e inversion ta 1 miyon, 10 miyon, tin cu pone 7.5 promil den e fundacion ey, unda cu e minister di infrastructura ta bay dicidi con ta parti e placa aki, ken ta haya, ken no ta haya. Si bo tabata asina transparente, pone bao di finansas. Laga e minister di finansas parti’e pa husticia, pa infrastructura, pa enseñansa, etc. E minister aki ta su fondonan, su banconan e kier. Aki un tiki, aya un tiki. Esey ta e problema cu tin den Serlimar y el a hung’e bon. El a tuma e parlamentarionan di MEP, el a changa nan.
