Benny Sevinger: Oponentenan politico di AVP ta desespera

Nos ta den e ultimo dos simannan prome cu eleccion y e campañanan a cuminsa bira cada biaha mas sushi tambe. Tabata tin un detencion atrobe dos dia pasa di un persona y nan a lig’e mesora cu e partido a cuminsa tene reunionnan interno. Por a tende varios voicenote bayendo rond di hendenan di oposicion cu ta mandando cosnan rond, bisando cu tanto minister Benny Sevinger, como minister presidente ta e siguiente, cu Hulanda ta biniendo Aruba, cu ta un caos total den e gobernacion, etc.

Minister Benny Sevinger a comenta cu si mira e reaccion den comunidad, bishitando cas, ta sinti cu e comunidad ta aproba e ultimo ocho añanan di trabao, den tur sector y comunidad ta cla pa duna partido AVP cuater aña mas pa caba cu e trabao y pone tambe e futuro generacion cla pa tuma over.

Esey ta supone cu oponentenan ta sinti esey tambe y e ora nan ta bira desespera y nan ta kere cu e unico forma con nan por gana eleccion ta si e minister presidente of minister Sevinger wordo deteni. E ora ey nan chens pa gana e eleccion ta.

Ta desesperacion esaki ta. AVP ta sigui campaña y sigui traha. Ministerio Publico ta sigui haci su trabao y un biaha mas, dia 22 di September, lo mira e resultado di e eleccion. Ta hopi convenci, mirando e resultadonan den comunidad, cu nan a aproba y ta aproba e maneho di e Gobierno aki y e proximo 4 añanan lo sigui padilanti cu e bon trabao cu a bin ta haciendo.

 

Persona deteni

Tin diferente persona cu a traha cu Minister Croes. Di e personanan cu a wordo deteni, ultimo no ta traha cu nan. Ta personanan cu ta hopi cerca si di e partido, esey ta algo cu no ta nenga. Ta hendenan cu tur dia ta wak, tur dia ta convivi cu nan como amigo y como partido. Esey no ta kita afo cu nan no ta trahando cu e Gobierno. Sinembargo, investigacion ta sigui su caminda y oposicion lo bira mas desespera segun dia ta bay. Nan ta mira tambe reaccion di comunidad cu ta AVP ta esun cu ta bay gana e proximo eleccion aki.

 

Trabao

Minister Sevinger a splica di e actividad cu a habri un Gazebo, cu a wordo traha den cuadro di Aruba Doet. Awo a haya e oportunidad cu e scol a organisa algo pa gradici. Infrateam hunto cu voluntarionan, cu sponsor, a traha e Gazebo di tempo di Aruba Doet. Awe a tuma luga e evento aki, cual ta algo cu no a wordo spera. Ta traha cu amor, cu boluntad pa haci algo bon pa comunidad, sin spera nada a cambio. Sinembargo ta mira cu e ta wordo aprecia y esey ta duna e empuhe pa sigui p’adilanti.

Unda cu bay den casnan, den barionan, na proyectonan cu ta realisa, e reaccion ta cu ta gradici pa loke a wordo haci y ta sostene tambe pa loke tin cu bin ainda. Ta hopi convenci di e reaccion aki y den e proximo cuater añanan, lo bay tin hopi trabao pa haci, hunto cu comunidad, pasobra ta haci’e pa comunidad. Awe comunidad por mira e diferencia, unda nan placa ta bay, den infrastructura, den enseñansa, den husticia, den deporte. Tur ministerio ta trahando duro pa hiba nos pais na un siguiente nivel y esey ta sinti aprobacion den nos comunidad pa esaki.

 

Reunion di urgencia

Por ta cerca e oposicion lo tabata tin un reunion di urgencia pa desesperacion. Pero cerca e partido ta reuni tur dia pa papia riba campaña, pa papia riba e ultimo dos simannan. E mesun reunion eynan a sosode ayera. Kier dun’e un otro tinta, pero ta keda pa nan. E partido ta djis sigui cu nan programa y sigui p’adilanti.