Den un conferencia di prensa na ex Bushiri Hotel, Minister Benny Sevinger, encarga cu Infrastructura, a expresa su satisfaccion cu porfin a cuminsa desmantela e ex hotel y cuminsa desaroya e area pa pueblo di Aruba. Asina Gabinete Mike Eman II ta cumpli cu otro promesa haci na pueblo, pa desaroya henter e area aki pa publico en general.
Pa logra yega na e punto aki, departamentonan di Gobierno mester a cana un caminda y proceso largo. No solamente e proceso hiba inicialmente pa logra haya un empresa pa renoba e hotel y pone den operacion, cual no a logra, pero tambe mester a haci un inventarisacion di ki tipo di material tin den e instalacionnan prome cu por yega na e parti di desmantelacion. A base di e rapport aki a bay destaho publico y e empresa cu e miho oferta tabata compania ‘We Build’ di Cornelies Van den Broek. “Hopi aña Bushiri Hotel a keda para manera un ruina y no a contribui cu nada na desaroyo turistico di e producto Aruba. Pesey ta masha importante cu a yega na e punto aki awe.”
Minister Benny Sevinger a bisa prensa cu e desaroyo di e area di Bushiri ta encera un plan total cu a cuminsa traha riba dje for di aña 2009, unda a papia cu ta bay renoba producto Aruba y a cuminsa cu e area di centro di ciudad.
Den e area di Bushiri tin dos proyecto cu ta bay ta simultaneamente den desaroyo. Na e ex tereno di APA, banda di lama, lo sigui cu ampliacion di Linear Park, conectando cu esun di aeropuerto y ta sigui for di waf te na Watty Vos Boulevard pa yega te na RIU Hotel. E parti di Bushiri lo bira un espacio publico, cu Mambo Beach bek, cual tabata masha popular bou di e habitantenan di Playa. E espacio publico aki ta encera hopi mas cu solamente un beach, creando facilidadnan pa practica diferente tipo di deporte y concierto. Riba loke tabata tereno di APA, a bira masha popular pa organisacion di conciertonan y ta bay construi un Plasa, riba cual por organisa concierto tambe. E plasa mester ta uno multifuncional cu por wordo uza tambe pa actividadnan folklorico, eventonan di arte, cultura y deporte. “E ta un plan total, un desaroyo completamente nobo. E unico exigencia cu a pone den e proyecto aki ta ta cu e no por ta un competencia pa caya grandi. Pues nada di negoshi mescos cu tin den Caya Grandi.” Pa e motibo aki tambe ta bay traha riba un conexion entre e area di ex Bushiri cu Caya Grandi, pa promove e centro di ciudad. Pero tambe corridor cu ta conecta e beach aki cu e areanan di Madiki, Playa Pabou, Cunucu Abou. “Nos ta hopi contento cu nos vision ta sigui cu desmantelacion di Bushiri. Nos a priminti y nos ta cumpli.”
Un deposito cu a yega di wordo poni door di un interesado, cu no a cumpli na tempo, ta bay wordo usa pa e trabounan di desmantelacion. E fondonan pa construi e plasa y haci e beach mas grandi, tambe ta aproba caba, Minister Benny Sevinger a bisa.
