Benny Sevinger (AVP): No tin problema cu Rocco Tjon a entrega otro keho na Ministerio Publico

Riba Dia di Gracia no ta e momento adecuado pa trece informacionan cu no ta mucho positivo na conocemento di pueblo pero miembro di fraccion di AVP, sr Benny Sevinger ta kere cu ta necesario pa coregi disparatenan cu politiconan rival ta trece dilanti.

Sr Sevinger a mustra cu esaki ta necesario ora cu scucha y mira politionan trata di manipula opinion di pueblo cu storianan di nan banda so sin sikiera trata di mustra e otro banda di e storia, buscando asina pa pueblo kere loke nan ta bisa.

“Rocco Tjon diaranson a duna un declaracion riba algun cos cu mi a trece dilanti diamars ultimo den conferencia di prensa y ta bon pa mi mustra e parti cu Tjon no kier papia ariba oa asina pueblo haya sa kende Rocco Tjon ta.

Tin diferente cos cu el a bisa cu nos tin cu para keto un rato pa analisa  esakinan y contradeci loke el a insinua despues.

Pa hopi tempo caba nos ta mira sr Tjon ta haci su cosnan, supuestamente el a drenta politica pa hiba un politica nobo pero mientras tanto nos ta riparando cu e ta un persona kende ta bida den un cashi di glas y ta hunga wega di tira piedra riba tur hende, principalmente riba contrincantenan di AVP, kendenan segun e no ta integro, esunnan cu ta corupto, esunnan cu ta ladron  y despues ta sconde man.

Pa mi experencia personal mi tin cu mustra cu Rocco Tjon ora cu el a drenta parlamanto den e prome siman caba, el a bay para na Ministerio Publico cu rapport contra mi persona pa haci un denuncia cu Benny Sevinger ta corupto, cu Benny ta ladron, cu Benny Sevinger ta bende droga, cu Benny Sevinger ta bende arma y tur esaki ta mustra ki tipo di persona a drenta den Parlamento.”

Parlamentario Sevinger a sigui mustra cu e no a kibra cabes cu nan, ya cu pa añanan largo e ta den politica, ocho aña den parlemento y ocho aña como Minister y for di dia cu su persona a firma e prome papel como Minister, partido MEP a cuminsa yama  su persona pa corupto y ladron.

“Añanan largo a insulta mi famia, insulta mi casa y ningun a worry pa loke ta trata yiu di Benny Sevinger, con e mucha aki ta bay scol, kico su amigonan ta pensa, kico nan ta puntre di su tata.

Awor mi por scucha sr Tjon ta papia dado momento cu ta lamentabel cu e caso cu a wordo menciona, ta trata di su yiu, cu aparantemente tin mas derecho cu e yiu di Benny Sevinger.

Sin duda mi ta sigur cu e casonan aki ta di lamenta y muchanan ta sufri bou di e tipo di casonan aki y e tipo di politica aki pero Benny Sevinger  su yiu no a cay for d palo y tur e añanan cu boso ta abusa, bosonan ta tira mokete tur dia den Solo di Pueblo, cu Benny Sevinger ta corupto, e ta ladron, cu e ta bende droga, e ta bende arma, ningun hende a kibra cabes.

Benny Sevinger no a  yora pero awor cu mi a kinipi bo un rato, bo a cuminsa yora y bo a bay Ministerio Publico, bo kier entrega keho un biaha mas pa loke mi a bisa.

Be my guest Rocco y mi ta bisa bo persona, ‘el que nada debe, nada teme’ y mi ta bisa bo, bo berdad den bo cara y mi ta bisa pueblo kende bo ta, ya cu nos tur a kere den bo,” parlamentario Benny Sevinger a declara.