“Hedging ta continua …..?? Unda e investigacion a keda di Gobierno y encuesta Parlamentario???”, asina Benny Nisbet, lider politico di partido PPA a duna di conoce awe.
E ta referi na e declaracion di Prome Ministro mr. Evelyn Wever croes cu a duna bendicion pa WEB continua cu ‘hedging’ pa termino cortico pa asina e ta mas responsabel y por controla y evalua esaki periodicamente. Tambe Benny Nisbet a scucha Wever bisa cu Hedging lo ta responsabilidad di WEB NV y cu e ta spera cu esaki tuma luga na forma responsabel.
E politico di partido PPA a sali bisa “Cu tur respet”, a hala un rosea grandi y su tras a agrega cu “Mi a spera cu e Gobierno nobo di MEP/POR/RED lo a inicia un investigacion pa pueblo por haya claridad con bin WEB cu bao Gabinete Oduber tabata hedge riba termina cortico, diripiente bao di Ex Minister Mike de Meza (AVP) a permiti un hedging a termino largo esta tres aña! Esaki a costa pueblo segun informacion 300 miyon florin y a pone cu pueblo a paga tres pa cuatro bes e prijs di awa y coriente pa tres aña largo. Un daño di otro mundo”.
Benny Nisbet kier sa kende tabata responsabel pa esaki? Ken a implementa e strategia aki mientras tabata custumbra pa hedge pa termino cortico, ora prijs a cuminsa baha internacionalmente a dicidi pa hedge a termino largo(3 aña) “Cu otro palabra either they we’re very very stupid or very very corrupt “, asina Benny Nisbet a skirbi riba su pagina di Facebook awe. Pesey e ta di opinion cu tur respet cu pueblo a spera di e gobernacion nobo aki un investigacion profundo den esaki.
“Mi ta cuestiona e declaracion di Min.Pres. Evelyn Wever Croes un poco si, pasobra ora declara cu ta WEB NV ta responsabel, esaki ta zona manera ta libra ex Ministro Mike de Meza?? Mester tene cuenta cu por tin responsabilidad como gerencia di WEB NV, pero tin responsabilidad politico tambe esta tanto di Ex Ministro Mike de Meza como pa cualkier mandatario presente y futuro”.
Tambe e ta cuestiona e responsabilidad di Parlamento tambe den esaki. “Mi ta di opinion cu nos representacion den Staten tambe por contribui na un investigacion door di tene un enquete pa asina cuestiona tur pero tur persona envolvi den e proceso aki tanto como professional tanto como politico/gobernante, pueblo no ta spera cu e grupo di politico di AVP ta logra sali completamente liber y ta bin funciona como representante di pueblo den Parlamento comosifuera cu nan no a kibra un copi. Mi ta spera cu tanto Gobierno como Parlamento tene debido cuenta cu mi remarcanan!”, asina Benny Nisbet a termina bisando.
Juancho Irausquin a funda Partido PPA dia 23 di october 1949. Su record den cantidad di voto tabata na aña 1973 cu 12.044 voto, mientras den eleccion di aña 2013 el a haya menos voto den henter su historia, solamente 506 voto. Den e ultimo eleccion, PPA a uni forsa cu UPP y hunto nan a cera 656 voto. Pa Benny Nisbet mes, el a conoce un caida so e ultimo eleccionnan. Na 1997 el a haya 968 voto, na 2001 a haya 931 voto, na 2005 a haya 436 voto, na 2009 a logra 329 voto, na 2013 a baha na 245 voto mientras cu den eleccion na 2017 a cay den voto te cu 150 voto.
