Carnaval 2020 ta yegando su final. Tanto e parada na San Nicolas conoci como e sitio unda carnaval ‘on di road’ a inicia y na mes momento unda e musica cu ta domina durante carnaval a inicia, esta Calypso, Soca, Steelband y e musica di Brassband. Carnaval 2020 tabata un periodo di hopi critica riba e organisacion (SMAC) cu ta indica necesidad pa un cambio profundo! Na mes momento nos por mira bek riba algun parada exitoso….tanto e parada di sunset na Noord, e Lightning Parade na tanto Oranjestad como San Nicolas y e parada final na San Nicolas como Oranjestad. Parada grandi di varios ora, colorido y cu un ambiente musical di nivel!
Bisando esaki NO ta nifica cu e Carnaval di Aruba no tin espacio ‘serio’ pa cambio, adaptacion y mas cu tur, un organisacion basa riba un vision di kico nos pueblo, nos carnavalistanan, nos bandanan musical ta kere cu Carnaval, siendo nos fiesta mas grandi nacional cu ta pone mas hende riba pia, lo mester bira….ki rol e lo mester hunga den nos pais y nos cultura.
Carnaval a bay atras ultimo decada den varios aspecto:
- Falta un escencia di e rol escencial di un parada di flambeu? Lo mester bin cu regla cu cada grupo participante lo mester tin “X” cantidad di flambeu y si no ta desea esaki lo mester dun’e un otro nomber.
- Mester organisa actividad di carnaval den TUR districto pa stimula desaroyo di carnaval.
- Lo mester evalua seriamente e asina yama ‘parada di blaas’ y su rol den nos carnaval?
- Lo mester stimula pa TUR participante den eleccion di Reina por haya sosten financiero adecuado, sino e interes lo sigui minimo.
- Sosten di gobierno pa nos Carnaval (kizas financieramente?)
- Kizas lo mester ta parti di un maneho cultural??
- Ta evidente cu e atencion pa ‘flota’ ta sigui desminui anualmente….mester stimula e ‘arte’ pa crea y inverti den flota/carosa.
- Con lo mester sostene musiconan/bandanan pa por proyecta nan mes den Reino Hulandes cu nan musica pero tambe den Caribe.
Entodo caso esaki ta algun punto y no kabe duda cu lo tin mas cu mi kier a presenta mientras mi ta ainda bou di e impresion positivo y menos positivo di nos Carnaval 2020. Mi ta spera cu ‘Carnaval’ ricibi e atencion mereci pa nos Carnavalistanan, lidernan musical, SMAC, SAC y Gobierno/Departamento di Cultura den futuro.
Masha pabien na TUR cu a participa pa haci Carnaval 2020 locual e tabata…..bunita….pero cu espacio pa mehora den futuro. Pabien na tur pero atende locual mester wordo atende pa tene nos Carnaval na bida cu progreso real.
