Shady ta un hobencita di 9 aña cu ta sufri di un malesa auto/neuro inmune cu ta dun’e sangramento severo, dolor di curpa y di cabes. Pa e motibo aki mes su famia kier colecta un suma pa hib’e Hulanda pa asina dun’e mas tratamento prome cu fin di aña. Shady dia pa dia su salud ta bayendo atras y su remedinan ta cabando.
Pa e motibo aki mes Team Up 4 Shady ta organisando un actividad pa asina recauda mas fondo pa asina logra cu e meta aki.
Diadomingo, dia 1 di november for di 11’or di mainta pa 3’or di atardi, nan lo ta dilanti Hamaka Sidewalk Cafe pa un drive by sale, caminda cu nan lo bende sweets and cake box, diferente sopi y tambe nan lo tin kids face mask.
Pa cada sopi y cahita di bolo lo ta 10 florin. Ta haciendo esaki pa logra cera e suma cu falta. Nan ta na mita caminda awor aki y ta spera cu diadomingo awo por logra cera esaki completo.
Ta bay tin sopi di pampuna, sopi di seafood y sopi di carni. E cakebox lo ta mixto.
Te awor aki nan a recauda un total di 24 mil florin, pero nan meta ta pa yega 20 mil euro. Tur esnan cu kier haci un donacion por haci esaki na cuenta di banco 620.047.08 di CMB riba nomber di Jedina Romero of tambe por tuma contacto cu 7417417 pa asina e colectantnan di Team Up 4 Shady por pasa cerca bo cu un buzon di colecta.
