Bencho y e gran crusada a coy plaza Un cuatrologia di escritora Olga Buckley

227

Ta net un luna cu a anuncia lansamento di e di cuater buki di e serie Bencho di autor Olga Buckley. Ya por bisa cu mescos cu e prome tres bukinan di e serie, Bencho ta dual, Bencho ta gana un bais y Bencho ta rebeldia, Bencho y e gran crusada ta hopi bon ricibi na Aruba y den exterior.

Benta na Boekhandel van Dorp y Plaza Bookshop ta bay hopi bon y ya a ricibi e peticion pa mas ehemplar. Si bo no tin di bo ainda, pasa busc’e. A drenta tambe hopi peticion di tanto hoben como adulto riba medianan social cerca e autora mes, pa cumpra e buki. Na Hulanda y Corsou tambe tin hopi interes pa tin un ehemplar di Bencho y e gran crusada. E interes aki ta hopi alentador, lesamento ta sumamente importante pa desaroyo y ta duna placer.

Un tip di Dylan y Cadee pa ’stayvacation’ y pa relaha, lesa buki.

No tin duda cu e reseñanan al caso y detaya di conocedor di literatura manera Prof. dr. Wim Rutgers, specialista di literatura y Sra. Alice van Romondt, bibliotecaria y ex-directora di Biblioteca Nacional Aruba, publica den medionan di comunicacion y riba Facebook, a aporta na e interes di e publico lesado pa lesa Bencho y e gran crusada.

Publicacion di buki ta hopi costoso, sin sosten financiero esaki ta casi imposibel. Autora Olga Buckley ta sumamente gradicido na Unoca y Prins Bernhard Cultuur Fonds Caraïbisch Gebied pa nan aporte na realisacion di Bencho y e gran crusada.

Bencho ta apto pa hoben y ta skirbi den nos lega materno.

Dylan y Cadee ta invita tanto hoben como tambe comunidad en general pa lesa tocante E gran crusada di Bencho, awo obtenibel na e librerianan, Van Dorp y Plaza Bookshop.

Pa mas informacion por bishita www.olgajbuckley.com y por tuma contacto na: [email protected]