Den un entrevista interesante cu e experto economico Ben Marapin, director di Headlines Group (24ora.com) Mark-Benson Denz a elabora riba e panorama economico cu e crisis di COVID-19 (coronavirus) cu a paralisa economia di Aruba. Un economia cu ta cuminsa move ora cu turistanan cuminsa yega Aruba bek, treciendo divisa. Pero prome cu yega na e sitio, Gobierno mester cuminsa corta den su gastonan, kita e diferente compensacion cu ambtenaarnan ta haya.Den e combersacion Marapin ta mustra cu lidernan di mundo y aki na Aruba a tarda pa mira e seriedad di coronavirus. A cuminsa tuma accion na momento cu ya caba coronavirus tabata algun paso nos dilanti.
No solamente pa salubridad publico y salud di hende, pero tambe pa economia di e pais. Asina algun siman atras ainda e Presidente Mericano Donald Trump a bagatilisa e situacion, bisando cu pa april tur cos lo ta na ordo. Pero esey no ta e caso. Pa Aruba, e situacion ta dificil pasobra no tin turista mas door di e “lockdown”. Turista ta carga e economia di Aruba, e ta e principal fuente di entrada, generando e divisanan necesario. E tanki no tabata bashi y tin reserva pa algun luna. Pero mester ta cauteloso cu su uzo. E daño ta depende con hopi ta tarda pa habri frontera bek. Den un escenario positivo, e ta papia di aki dos te cu 3 luna, Aruba por ta liber di e coronavirus y por cuminsa habri su porta. Pero kisas Merca lo no ta cla ainda. Por pensa pa busca of atrae bishitante di areanan menos afecta manera Canada, Chile, y Colombia cu ta parce di no tin un impacto grandi di coronavirus. Tin algun actividad chikito for di turismo y si e duro un tres luna, e daño pa Aruba su economia ta un dip di rond di 7%. P’esey ta importante pa Aruba ta cla na momento cu temporada di high season ta yegando. Mester percura pa prome cu esey Aruba ta “clean” di coronavirus.
“Esey ta responsabilidad di nos tur, pa mantene un distancia y no pega otro cu e malesa y pa e disparce.” Aworaki entrada di divisas a para. Y mester bay uz’ di un bon forma. Normalmente ora cu e baha ta presta placa na condicionnan atractivo. Pero Gobiernonan a presta demasiado placa den pasado. E Gobierno actual, apesar di tabata na altura cu e situacion ta hopi serio y debe ta hopi halto, y nan a traha e rapport “Feestvierend ten ondergang”, a crea entrada adicional pa Gobierno. Pero no a uza tur e placa extra pa loke e tabata destina, esta stabilisa finanzas publico y na mesun momento baha gastonan. “Si a haci esey, kisas awe nos lo tin un situacion completamente diferente. E unico opcion pa scapa Aruba basta ta si acerca Hulanda pa yuda cu un “bridge financing” y no hacie den euro, cu su cambio ta varia.
Y e mester ta na un interesa masha razonabel.”Mester uza e divisanan cu Aruba tin di un forma inteligente, pero tambe pa esnan cu tin debe, wanta e pago di debe y interes pa algun luna. Pero loke no mester haci ta aumenta e debe aki cu interes extra pa e lunanan cu no a paga. “Lo ta bon pa banconan compronde cu nan tambe mester “slow down” riba esaki. “ Pero tambe mester cuminsa hala faha mara. Gobierno mester cuminsa tuma decisionnan pa no paga e compensacionnan na ambtenaarnan y stop tur compensacionnan na companianan estatal, y esnan cu ta haya placa di Gobierno. Di e forma aki ta scapa mas cupo di trabou.
