Algun luna pasa Edward Maduro, presidente di sindicato SADA a wordo suspendi, hunto cu tres colega mas, riba arma di candela cu a disparce for di Aduana. Maduro, como un toezichthouder, hunto cu otro, mas dos hefe di nan, a keda suspendi.
Maduro a comenta cu e toegangsontzegging tabata pa seis siman, cu un opcion pa prolongacion di seis siman mas, e siman cu a pasa tabata e seis siman cu a pasa. A yama Maduro bek pa bay traha y esaki tabata algo cu el a spera.
Manera cu a comenta den un rueda di prensa despues di 3 dia di e prohibicion a bay aden, a indica cu esaki, den nan opinion como sindicato, ta un persecusion. Ta obvio cu no tabata tin nada. No obstante esey, a bay corte pa loke ta trata esaki. No a haya sentencia si ainda. E ta un practica normal cu ta prolonga e seis siman extra, cu ta bay keda 12 siman. Anticipando esey, a bay corte. Pero pa nan sorpresa a haya un carta cu no lo bay prolonga e suspension. Maduro mes a cuminsa traha bek e siman cu a pasa.
Sentencia
Maduro a splica cu e sentencia lo por mustra cu enberdad e ontzegging tabata inhusto. Hopi biaha den un caso di un toegangsontzegging, bo mannan ta mara. E no ta un schorsing, cual ta hopi diferente. Un toegangsontzegging ta un orde maatregel cu nan ta tuma pa haci investigacionnan interno. Bo no por yega sin mas y duna ontzegging na cada ken cu haya gana of cu un hende cu no gusta. E mester ta basa cu pruebanan fuerte, pasobra e no ta facil. Esey ta loke a ilustra na hues durante e tratamento di e caso. Dia 4 di november ta poni pa haya e sentencia. Maduro ta na trabao berdad, pero e unico cos ta cu e sentencia por pone peso y confirma cu esaki tabata un accion inhusto contra su persona.
Maduro ta keda para ariba cu esaki no mester a bay asina leu. Nan no ta sinta den stoel di leiding, pero por tabata tin otro manera pa atende cu e caso aki.
E arma
Maduro no ta na altura si a haya e arma of no. No a ni interoga verhoor nan, segun Maduro ni tampoco si e investigacion a conclui. E tabata tin un combersacion cu e waarnemer cu e mester cuminsa traha bek. E no por bisa si e arma a wordo haya of no y con leu e investigacion ta.
E hecho ta straño, e manera con tur e proceso a cana. Pero un biaha mas, Maduro, den calidad di presidente di sindicato, ta bolbe pisa y pone enfasis, cu den nan opinion, e cos aki tabata un persecucion. Unabes cu a wak nomber di Edward Maduro, nan a core tuma decisionnan sin bay wak en realidad kico tabata e situacion riba e dia en cuestion. Esey ta algo cu a stress riba dje durante tratamento den corte. E ta di lamenta pasobra. Aña pasa e director a raporta Maduro pa un informacion cu a saca den prensa. Te dia di awe e asunto a bay den doofpot. Ta bay un aña cu esey a pasa. Ya caba e tempo ey a señala cu esey ta trata di un persecucion como presidente di sindicato. Por mira un biaha mas, den e caso di aña pasa, nada no a sali na cla tampoco. Minister no kier a interveni tampoco. Awor aki atrobe, leiding a tuma un paso contra Maduro. Y atrobe cosnan no a bay segun cu a kere den un investigacion den e magnitud aki con el a tuma luga. Tempo lo papia y lo keda en espera di e veredicto di corte, cual lo por tin un influencia riba e standpunt cu nan tin.
Investigacion
Pa loke ta trata e investigacion, ni como sindicalista, ni como ambtenaar, Maduro no tin conocemento di nada. Nan no a scuch’e. E ta di lamenta y esey ta loke el a señala na leiding.
Te asina leu ta dos persona so a presenta bek na trabao. E otro dos personanan si a haya prolongacion. Sindicato ta lucha pa su miembronan y demas coleganan den Departamento di Aduana.
