Beach Tennis World Championship 2019 Arubianonan representando nan pais na Italia

Actualmente ta tumando lugar e “Beach Tennis World Championship 2019” na Terracina Italia, caminda tin algun di nos hungadornan local participando. Entre nan nos tin Aksel Samardzic, kende a forma ekipo cu Ramon “ Nacho” Guedez, sigur un persona no desconoci den e deporte di Beach Tennis na Aruba. Tambe nos tin e ekipo forma di dos Arubiano, esta Louis Posner y Sander Castro.

E prome ronde a termina ayera, caminda e ekipo local, Louis y Sander mester a subi tereno contra e ekipo fuerte, campeon mundial di 2018, Thales y Marcus di Brazil. E team local a perde den 2 set. E ekipo forma pa Aksel y Ramon, mester a enfrenta un tremendo ekipo di Italia, Diego Bollettinari, ranked 23 di mundo y Marco Faccini, ranked 25 di mundo. Durante un tremendo wega, cu a bai 3 set, Aksel y Ramon ta Sali vencedor y asina aki pasa pa e segunda buelta. Mester remarca cu Aksel actualmente ta number 22 y Ramon number 14 riba e ranking mundial.

Esaki ta nifica, cu awe, diahuebs 13 di juni, Aksel y Ramon lo enfrenta un duo hopi mas fuerte, cara nan conoci sigur na Aruba, cual nan ta Marco Garavini y Luca Meliconi. Nan ranking mundial respectivamente ta 11 y 78. No por balota ningun ekipo na e nivel aki, ya cu unicamente e top 32 mihor ekipo nan di mundo ta logra participa. Di e 32 ekipo nan aki, ITF ta 4 ekipo un free chance (wild card) y tambe 4 ekipo por cualifica, hungando un torneo 3 dia prome cu e mundial cuminsa. Banda di e 8 ekipo nan aki, e ranking conhuntamente ta defini bo participacion den e mundial si of no.

Nos na Aruba sigur lo keda pendiente di e resultado di e wegana di e duo forma pa Aksel y Ramon. Pa Sander y Louis, e wega perdi den e prome ronde ta nifica cu automaticamente nan ta afor di e competencia pero nos ta sigur cu esaki a forma parti di nan practiva pa e mundial di pais cual lo cuminsa dia 2 juli benidero na Russia, caminda nos bandera una bes mas lo ta presente

Comments

comments