Be my Valentine: Awe ta dia di San Valentin

Dia 14 di februari ta celebra dia di tur persona namora of Dia di San Valentin, momento unda cu amor ta tuma e papel protagonico y ta sosode escena romantico den tur skina di nos planeta.

E enamoradonan ta duna regalo na nan pareha, ta pidi matrimonio n’e persona stima y e rednan social ta inunda cu frase di amor y tambe di meme riba e dia di tur esunnan namora, algun di nan hopi imaginativo y dibertido.

E STORIA BERDADERO DI DIA DI SAN VALENTIN

A pesar di e fama comercial di e celebracion aki, origen di e Dia di tur Enamoradonan ta bin di hopi tempo pasa. Ta trata aki di un festividad religioso, ya cu e ta conoci p’e nomber di un santo. Y no ta trata di un santo cualkier, sino di uno cu a revela e poder na su momento y a sufri e consecuencianan p’esey.

Na Roma, den siglo III, emperador Claudius II a dicidi prohibi casamento di hende hoben, considerando cu e solteronan sin famia tabata e miho soldanan door di no tin vinculo sentimental ni ta mara na un pareha. Tampoco mester ta obvio di e echo cu den e epoca aki Cristianismo tabata prohibi na Roma.

Un sacerdote yama Valentin a considera cu esaki tabata un eror y a dicidi di ‘bypass’ e ordo y casa den secreto tur e hobennan namora cu tabata kier asina. Ora cu el a haya sa di e acto di rebeldia aki, e emperador a sentencia Valentin na morto, riba dia 14 di februari di aña 270.

San Valentin t’e patrono di e enamoradonan y ta p’esey ta celebra tur aña riba dia 14 di februari Dia di San Valentin of Dia di e Enamoradonan.

Ta existi un sin fin di leyenda rond di e storia di San Valentin. Un di nan ta señala cu mientras e sacerdote Valentin tabata den e prizon sperando su destino final, el a namora di un hoben ciego cu tambe tabata encarcela y na cual el a haci e milager p’e por mira prome cu el a muri.

Tin un registro cu a celebra e prome dia di San Valentin riba dia 14 di februari 494. Na principio, e fiesta tabata oficial di Iglesia Catolico, te cu na 1969, durante e Concilio Vaticano II a elimin’e di e kalender liturgico.

Awendia e celebracion di San Valentin a popularisa rond mundo y a bin ta probecha p’e mercado p’e creacion di tur tipo di producto pa su comercialisacion.

CURIOSIDAD RIBA DIA DI SAN VALENTIN

Conoce algun di e curiosidadnan y informacion interesante riba Dia di San Valentin:

* Na Spaña a cuminsa celebra Dia di e Enamoradonan durante memey di siglo XX, promociona pa un cadena grandi di tienda Galerias Preciados, pa incentiva e cumpramento di regalo.

* E empresario Norte Americano Esther Howland a pone e regalamento di carch’i di San Valentin entre e enamoradonan na moda. El a cuminsa bende nan den un libreria cu su tata tabata maneha na Massachussetts. Y nan a popularisa di tal manera cu ainda e ta un custumber di awendia.

* Cupido (Eros) t’e simbolo universal di Amor.

*Afrodita (Aphrodite of Venus) t’e dios Griego di amor.

* Ta calcula cu cada persona ta namora un promedio di 7 biaha prome cu e casa.

* Tur 14 di februari ta permiti shete pareha casa riba piso 80 di e iconico Empire State Building na New York.

* E ciudad Paris, na Francia, ta considera como e capital mundial di amor.

* Na Dinamarca tin e custumber di regala e parehanan flor blanco, conoci como “snowdrops”.

*Riba Dia di San Valentin ta aumenta benta di preservativo (condom, etc) cu 30%. Den e luna di maart ta registra un aumento di benta di test di embaraso.

* Na Hapon, solamente e hende muhe ta corteha nan pareha riba e fiesta conoci como Tabanata. Segun e tradicion, nan mester regala nan ‘yoncuman’ chuculati.

* Anualmente, dia 14 di februari, e parehanan Hapones ta subi Mount Fuji pa bati tres biaha e klok di amor, pidiendo amor eterno.

*Riba Dia di San Valentin ta intercambia por lo menos mil miyon carchi tur aña.

* A skirbi e prome carchi di San Valentin dia 14 di februari 1381, den cuadro cu e casamento di Richard II di Inglatera y Anne di Luxemburg. Tabata un poema dedica cu e frase “pasobra ta Dia di San Valentin ora cu cada parha ta scoge su pareha.”

* E carga di e amantenan di Tarot semper ta positivo. E ta representa pa dos enamorado, vigila pa Cupido y pa un strea colo di oro.

* Tur aña na Verona, Italia, ta yega por lo menos 10 mil carta dirigi na Julieta, un di e personahenan memorabel di e obra “Romeo y Julieta”, inmortalisa pa Shakespeare.

*  E rosa cora tabata e flor faborito di Venus, e dios faborito di amor. Fuera di esey ta considera e flor di amor, debi cu e color cora ta representa sentimento romantico fuerte.

* Ta calcula cu e expresion famoso “media naranja” ta bin di e dialogo platonico E Bankete, di Plato. E ta nifica alma gemela (soul mates), ya cu un persona ta contempla e otro como e mita di dje.

* Lovebirds of turtle doves, ta representa harmonia, paz, union, como tambe amor y amistad entre dos persona. For di eynan e dicho conoci “nan parce lovebirds”.

* Solamente na Merca ta cumpra mas di mil miyon dollar na chuculati y 187 miyon di rosa, durante e dia romantico aki.

DIA DI SAN VALENTIN NA DIFERENTE PARTI DI MUNDO

Dia di San Valentin ta di origen Europeo y na hopi pais di Europa e ta conoci como e Dia Internacional di e Enamoradonan, manera cu ta sosode na Spaña, Francia of Belgica.

Sinembargo, no tur pais ta celebra San Valentin riba e mesun dia ni tin e mesun custumbernan:

* Na Argentina ta celebra e Siman di Dulsura, dia 1 pa dia 7 di juli. Ta duna cos dushi a cambio di sunchi.

* Na Bolivia e Dia di e Enamoradonan ta conoci como Dia di Amor y Amistad y ta celebra dia 21 di september, coincidiendo cu e prome dia di primavera ora cu e parehanan ta regala flor y carchi. Dia 14 di februari no t’e dia di festeho, ya cu e ta coincidi cu e invasion Antofagasta cu a cuminsa cu e Guera di Pacifico.

* Na Brasil, Dia di e Enamoradonan of Dia di Pareha, ta celebra dia 12 di juni, na memoria di San Antonio di Padua. E luna di februari ta dedica exclusivamente na carnaval.

* Den Centro America ta celebra dia 14 di februari, pero ta conoce como Dia di Amor y Amistad of Dia di Cariño y ta enfoca mas bien riba amistad.

* Na China ta festeha esaki durante e di shete dia di e di shete luna lunar. Ta celebra “E festival di Dobel Shete”.

* Na Egipto ta celebra e dia riba dia 4 di november.

* Na Israel ta celebra riba dia 30 di juli, conoci como Tu Be Ay.

* Na Hapon, Dia di San Valentin, conoci como Tanabata, ta celebra for di aña 1958 impulsa pa un empresa di chuculati y e tradicion ta cu e hende muhenan ta regala chuculati na tur hende homber, incluyendo nan colega di trabao, aunke ta reserva e miho chuculati pa su pareha. Y un luna despues, na maart, e hende hombernan ta debolbe e hende muhe e detaye, conoci como Dia Blanco, dunando regalo di colo blanco, manera chuculati blanco of lingerie di e colo aki.

* Na Uruguay ta celebra ‘por partida doble’: Dia di Enamoradonan dia 21 di september y San Valentin dia 14 di februari.

FRASE FAMOSO RIBA ENAMORADONAN

Conoce algun frase famoso relaciona cu e enamoradonan y amor:

* “Un hende ta namora ora cu e ripara cu e otro persona ta unico” (Jorge Luis Borges).

* “Den un sunchi lo bo haya sa tur loke mi a silencia” (Pablo Neruda).

* “Esun cu a conoce solamente su casa y a stim’e, sa mas di hende muhe di esun cu a conoce mil” (Leon Tolstoi).

* “Ofrece amistad n’esun cu ta pidi amor ta manera duna pan n’esun cu ta muri di sed” (El Arte de Amar-Ovidio).

* Amor ta sa con pa bisa mi stima bo sin papia” (Víctor Hugo).

* “E amor berdadero no ta otro cos cu e deseo inevitabel di yuda e otro p’e ta loke e ta” (Jorge Bucay).

* “No tin homber asina cobarde cu amor no ta haci balente y transform’e den un heroe” (Plato).

* Stima ta tempo perdi si e no ta corespondi” (Spaño)

CON BO POR CELEBRA E DIA

Den e celebracion di e dia aki generalmente tin e custumber di sali bay come den pareha of bay mira un pelicula, sin lubida di intercambia algun regalo manera chuculati, flor of joya. Si bo no comparti e nificado comercial di Dia di San Valentin, tin hopi cos cu bo por haci sin gasta placa, manera disfruta di un marathon di pelicula riba Dia di e Enamoradonan na cas, pasa tempo hunto den un paseo romantico of dedica frase di amor na bo pareha.

Si bo no tin pareha, bo tambe por celebra amistad cu bo amigonan of disfruta di e humor di e memenan cu sa manifesta riba e rednan social riba e dia aki.

For di aki Headlines Group, cas editorial di 24ora.com y TREMPAN, ta desea bo(so) un Feliz Dia di San Valentin.